Хитойда ёғингарчилик ва тошқинлар оқибатида 164 киши ҳалок бўлди

Хитойда охирги бир ҳафта мобайнида ёғингарчилик ва унинг оқибатида келиб чиққан тошқинлар туфайли 126 минг уй вайрон бўлди. 344 минг уйга турли даражада зарар етди. Бу ҳақда «ТАСС» хабар бермоқда.

ХХР фуқаролик маъмурияти вазирлигининг билдиришича, мамлакатнинг ўнта минтақасида камида 164 киши ҳалок бўлди, 125 киши бедарак йўқолган деб ҳисобланмоқда.

Илгари қурбонлар сони 130 кишига етгани, 11 киши бедарак йўқолгани хабар қилинган эди.

Энг катта зарар кўрган провинциялар Хэнань ва Хэбэй бўлиб, у ердан 514 минг фуқаро эвакуация қилинди, шулардан 125 минг нафари шошилинч ёрдамга муҳтож.