Януковичга тегишли 27 та ретро-автомобиль хатланди

Украинанинг собиқ президенти Виктор Янукович Россияга қочганидан сўнг унинг Межигорьедаги қароргоҳида қолган ретро-автомобиллар коллекцияси хатланди. Киевнинг Печерский туман суди томонидан чиқарилган тегишли қарор Суд қарорлари ягона реестрида чоп этилди, дея хабар беради «Корреспондент.net». 

Тергов манбаларига кўра, 27 та автомобиль Януковичнинг Межигорьедаги маиший эҳтиёжларини қондириш учун махсус ташкил этилган «Киевуниверсалсервис» МЧЖ балансида сақланмоқда. Суд қарорига кўра, хатловдан мақсад Янукович атрофидаги мансабдорларга қарши очилган ноқонуний даромад ва ўта йирик миқдорда давлат мулкини эгаллаш бўйича жиноий иш доирасида мулкни мусодара этишдан иборат. 

Ҳозирда мазкур автомобиллар Киевдаги ретро-автомобиллар музейида сақланмоқда.