Қозоғистон президенти Нурсултон Назарбоев ижро ҳокимиятидаги раҳбар кадрлар билан боғлиқ бир неча ўзгаришларни амалга оширди. Бу ҳақда «ТАСС» хабар бермоқда.
Давлат раҳбари миллий иқтисодиёт ва қишлоқ хўжалиги вазирлари, ҳукмрон «Нур Отан» партиясидаги ўринбосарини алмаштирди, шунингдек, янгидан тузилган ахборот ва коммуникациялар вазирлиги раҳбарини тайинлади.
Экспертлар юз берган ўзгаришларни Ер кодексига тузатишлар киритишга оид вазият билан боғламоқда. Қишлоқ хўжалиги ерларини бозор айланмасига киритиш, жумладан, ерларни чет элликларга ижарага бериш муддатини 10 йилдан 25 йилгача кўпайтиришни назарда тутувчи мазкур тузатишларга аҳоли томонидан ижобий муносабат билдирилмади.
5 май куни Остонада бўлиб ўтган йиғилишда Назарбоев ўтказилаётган ер ислоҳотларининг маҳаллий аграр саноати учун муҳимлигини таъкидлаган, «Ер кодексига киритилаётган тузатишлар моҳиятини аҳолига етказиб беролмаган» давлат идораларини кескин танқид қилганди.
Изоҳ (0)