Сурияда мамлакат ичида кўчирилган кишилар лагерининг бомбардимон қилиниши ҳарбий жиноят деб баҳоланиши мумкин. Бундай нуқтаи назарни БМТнинг инсон ҳуқуқлари бўйича Олий комиссари Зайд Раад ал-Ҳусайн Женевада айтиб ўтди, деб ёзади «ТАСС».
«Мен Сурия шимоли-ғарбида, Туркия чегараси яқинидаги Сармадада лагерлар бомбардимон қилинганини сўзсиз қоралайман», — деди ал-Ҳусайн.
Унинг таъкидлашича, ушбу лагерлар бу жойда бир неча ҳафталардан бери турибди, шу туфайли «қирғинли ҳужумлар тасодиф бўлганлиги амри маҳол». «Улар қасддан уюштирилгани ва ҳарбий жиноятларга тааллуқли эканлиги эҳтимоли кўпроқ», — дея ўз фикрига якун ясади БМТнинг инсон ҳуқуқлари бўйича Олий комиссари.
Унинг сўзларига кўра, «дастлабки хабарлар ҳужумларни Сурия ҳукумати уюштиргани ҳақида маълум қилган, аммо буларнинг барчаси ҳали текширилиши керак».