Буюк Британияда тиббий муассасаларнинг ёш ходимлари иш ташлаши туфайли 125 мингдан ортиқ операция ва шифокор қабули бекор қилинди. Мамлакатдаги ҳар учинчи касалхона ҳозирнинг ўзида қалтис вазиятда эканлиги билдирилмоқда, дея хабар беради «РИА Новости».
The Telegraph манбаларига кўра, 26—27 апрель кунларига мўлжалланган 48 соатли иш ташлаш давомида Британия тиббиёт ассоциацияси аъзолари саналадиган ёш шифокорлар (меҳнат стажи 10 йилдан ошмаганлар шу тоифага киради) тарихда биринчи бор беморларга ҳеч қандай, ҳатто шошилинч ёрдам ҳам кўрсатмайди. Олдинги норозилик акцияларида реанимация, туғруқ ва шошилинч ёрдам бўлимлари навбатчилари иштирок этмаганди.
Буюк Британия соғлиқни сақлаш вазири Жереми Хант иш ташлаш қатнашчиларига мурожаат этиб, норозилик акциялари беморлар ҳаётини хавф остига қўйиши, аҳоли хавотирига сабаб бўлишини таъкидлаганди. Олдинроқ ёш шифокорлар вазирга очиқ мактуб йўллаган ва уларни қониқтирмайдиган янги шартномаларни жорий этмасликка чақирганди. Бироқ, иш ташлаш санаси белгиланганига қараганда, ҳукумат режаларидан воз кечмаган кўринади.
37 минг шифокор Британия тиббиёт ассоциацияси аъзоси ҳисобланади.
Изоҳ (0)