Австрия полицияси Европага қочоқ тарзида кириб келган ва шериклари билан бирга 2015 йил 13 ноябрдаги Париж терактларида иштирок этишни режалаштирган ИШИДнинг икки нафар террорчисини қўлга олди. Бу ҳақда «ТАСС» хабар бермоқда.
The Washington Post манбаларига кўра, 23 ёшли покистонлик Муҳаммад Усмон ва 28 ёшли жазоирлик Одил Ҳаддодий Туркия орқали Грециянинг Лерос оролига кейинчалик Stade de France стадионида ўзини портлатган икки нафар ироқлик худкуш террорчи билан бирга, суриялик қочоқларнинг катта гуруҳи таркибида ноқонуний равишда келган.
ИШИДдан Франция пойтахтида терактлар уюштириш бўйича махсус топшириқ олган бу 4 шахсда ҳам қалбаки паспортлар бўлган ва улар ўзини суриялик сифатида таништирган. Агар Усмон ва Ҳаддодий Парижга етиб борганда теракт қатнашчилари сони 9 эмас, 11 кишига этган ва қурбонлар сони янада кўпайган бўларди.
ИШИДга 2014 йили аъзо бўлган покистонлик ва жазоирлик икки ироқликдан фарқли равишда Греция расмийларида шубҳа уйғотгани сабабли мамлакатдан чиқариб юборилган ва Парижга етиб бормаган. Улар Европа бўйлаб узоқ тентиришдан сўнг Австриянинг Зальцбург шаҳридаги қочоқлар лагерига бориб қолган ва Париждаги ҳужумлар тафсилотини ўрганаётган француз ҳамкасблари маълумотларига таянган маҳаллий полиция томонидан қўлга олинган. Махсус хизматлар Усмон ва Ҳаддодийни сўроқ қилган ҳамда улардан Зальцбургдаги лагерда яна икки гумонланувчини ҳибсга олишга имкон берган қимматли маълумотларни олган.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)