GoEuro нашри томонидан ҳозирланган Global High-Speed Train Ranking рейтингида тезкор ҳаракатланувчи поездларга эга мамлакатларнинг темир йўл инфратузилмасига баҳо берилди.
Рейтингни тузишда давлатларда ишлаётган поездларнинг рекорд ҳамда операцион тезликлари, темир йўл тизими қоплаган ҳудуд, аҳоли қамрови, аҳолининг 1 километр йўл учун харажатлари сингари критерийлар инобатга олинди. Ушбу кўрсаткичлар бўйича энг яхши натижаларни қайд қилган 20 давлат рейтингдан ўрин олди.
Биринчи ўринни Япония эгаллади. Учликка Жанубий Корея ва Хитой якун ясади. Кучли ўнликка, шунингдек, Франция, Испания, Тайвань, Германия, Италия, Австрия, Туркия кирди.
Ўзбекистон жорий рейтингда 17-ўринни эгаллади. Маълум бўлишича, мамлакатнинг тезюрар поездлари қайд қилган рекорд тезлик 255 км/соатни, операцион тезлик эса 250 км/соатни ташкил қилади. Мамлакат темир йўл инфратузилмасининг 8,21 фоизини тезкор ҳаракатланувчи поездлар эгаллайди. Аҳолининг 9,01 фоизи тезкор поездлардан фойдаланиш имкониятига эга, бунда 1 километр йўлга ўртача 0,18 евро сарфланади.
Ўзбекистондан кейинги ўринларда Норвегия, АҚШ ва Финляндия жойлашди.
Изоҳ (0)