Нью-Йорк автосалонида World Car of the Year халқаро танлови ғолиби аниқланди. 73 нафар экспертдан иборат ҳакамлар ҳайъатининг энг кўп овозини Mazda MX-5 родстери тўплади ва «Йил автомобили» номига сазовор бўлди, дея хабар беради «Autonews.ru».
Mazda MX-5 мазкур нуфузли танловда Audi A4, BMW X1, Hyundai Tucson, Jaguar XE, Land Rover Discovery Sport, Mazda CX-3, Mercedes-Benz GLC, Skoda Superb ва Toyota Prius’ни ортда қолдирди. Шунингдек, родстер «Энг яхши дизайнга эга автомобиль» деб ҳам топилди.
Асосий номинациядан ташқари, танлов доирасида қўшимча номинациялар ғолиблари ҳам эълон қилинди. Жумладан, BMW 7-Series «Энг ҳашаматли автомобиль», Audi R8 «Энг яхши спорт автомобили», Toyota Mirai эса «Энг аъло яшил автомобиль» деб топилди.
Маълумот учун, «Йил автомобили» танлови 2005 йилдан бери ўтказиб келинади. Ўтган йили ушбу номга Mercedes-Benz C-Class эга бўлганди.
Изоҳ (0)