Тошкентнинг «Бодомзор» маҳалласида 22 март, сешанба куни йирик йўл-транспорт ҳодисаси юз берди. Бу ҳақда Facebook’даги «Водители Ташкента (Drivers.uz)» гуруҳида хабар қолдирилган.
Гуруҳ фойдаланувчилари томонидан қолдирилган хабарларга кўра, маҳалла ичида катта тезликда ҳаракатланган Chevrolet Captiva ҳайдовчиси, бошқарувни йўқотиб, пиёдалар йўлкасига ўтиб кетиб, жиддий зарарланган. Фотосуратларда Captiva ҳайдовчисининг ҳаракатлари сабаб маҳалла ичида ҳаракатланаётган Chevrolet Spark ва Chevrolet Cobalt автомобилларига ҳам зарар етганини кўриш мумкин.
23 март, чоршанба куни Facebook’даги «Водители Ташкента» гуруҳида мазкур ҳодиса билан боғлиқ янги фотосуратлар ва тафсилотлар эълон қилинди. Шу маҳаллада истиқомат қилувчи фойдаланувчи томонидан жойлаштирилган маълумотларга кўра, ҳодиса натижасида уч боланинг онаси бўлган аёл жиддий жабрланган, ҳозирда реанимация бўлимида ётибди. Бошқа жабрланувчилар ҳақида аниқ маълумотлар йўқ.
Хабарга илова қилинган фотосуратларда Тошкентдаги коллежлардан бирида ўқувчи қизнинг ўқувчилик гувоҳномаси ҳам кўрсатилган бўлиб, хабар муаллифининг таъкидлашича, Captiva рулида айнан шу қиз бўлган. Бироқ Facebook фойдаланувчилари гувоҳноманинг ва ундаги қиз суратининг ҳақиқийлигини шубҳа остига олган (гувоҳномадаги коллеж муҳри сурат устида эмас, остида қолган, шунингдек, гувоҳнома рақами ўрни бўш қолдирилган).
Изоҳ (0)