Россиянинг Ярославль шаҳрида кўп қаватли уй подъездининг қулаши оқибатида ҳалок бўлганлар сони тўрт кишига етди. Бу ҳақда шаҳар ҳуқуқ-тартибот органларига таянган ҳолда «ТАСС» агентлиги хабар бермоқда.
Фожиа бугун, 16 февраль куни, Москва вақти билан соат 04:20 да содир бўлди. Кўп қаватли бинонинг вайрон бўлган секциясида 10 та хонадон жойлашган эди. Газ ускунасидаги носозлик туфайли келиб чиққани тахмин қилинаётган портлаш оқибатида подъезд қулаб, бинонинг бир қисми вайрон бўлди. Вайроналар остидан шу пайтга қадар уч жасад чиқариб олинди.
Бундан ташқари, шифохонага олиб кетилган жабрланувчилардан бири оламдан ўтди. Яна уч кишига тиббий ёрдам кўрсатилмоқда. Фавқулодда вазиятлар вазирлигининг Ярославль шаҳар бошқармаси матбуот котиби Михаил Зверев берган маълумотга кўра, кинологик хизмат ходимлари камида яна бир киши вайроналар остида қолаётганини аниқлаган. Қўшни подъездларда истиқомат қилувчи одамлар эвакуация қилинган.
Изоҳ (0)