Эрон ўзининг темирйўл тармоғидан фойдаланган ҳолда Европа ва Хитойни транспорт йўллари билан боғламоқчи эканлиги ҳақидаги режасини эълон қилди, деб хабар беради «ТАСС».
15 февраль, душанба куни «Янги ипак йўли» лойиҳаси доирасида Хитойдан Теҳронга етиб келган юк поездини кутиб олиш маросимида Эрон Темирйўллари бошқарувчи директори Муҳсин Пурсаид-Агаий «ипак йўли йўналишида жойлашган мамлакатлар қадимий савдо йўлини қайта тиклашга уринаётгани»ни маълум қилди.
«Бу поезднинг йўлга чиққанидан сўнг икки ҳафтадан камроқ вақт ичида Теҳронга етиб келиши мислсиз натижа, ахир поезд суткасига ўртача 700 километрни босиб ўтди», — деди Пурсаид-Агаий. Унинг сўзларига кўра, темирйўли орқали юк ташиш денгиз йўналиши бўйича юк ташишга қараганда йўлни 30 кунга қисқартирган. «Бу Шанхай порти Эрон орқали Европа билан боғланишини англатади», — деди Эрон Темирйўллари бошқарувчи директори.
Унинг маълумотларига кўра, Эрон темирйўллари орқали транзит юкларни ташиш йилига 1,5 миллион тоннадан 4 миллион тоннага ошади.
Поезд 29 январь куни Хитойнинг Шинжон-Уйғур автоном туманидан 32 та контейнер билан йўлга тушганди. У 10 минг километр масофани босиб ўтди, жумладан, Қозоғистон ва Туркманистон ҳудудидан ҳам ўтди.
Изоҳ (0)