Александр Лукашенко Украина билан чегарада муҳандислик иншоотлари қурилишини эълон қилди

Беларусь президенти Александр Лукашенко хавфсизликни мустаҳкамлаш учун Украина билан чегарада муҳандислик иншоотлари қурилишини эълон қилди. Бу ҳақда у Жлобин металлургия заводи ишчилари билан учрашуви чоғида маълум қилган, дея хабар бермоқда «liga. Новости».

«Қурол, автоматлар, ўқ-дори олиб ўтиляпти, ўзлари келишяпти. Наркотиклар тўғрисида гапирмаса ҳам бўлади... Биз чегарани тўлиқ ёпдик, ҳозир сўроқсиз шарпа ҳам ўтмаслиги учун муҳандислик иншоотлари барпо этяпмиз. Мамлакат хавфсизлиги тўлиқ таъминланади», — дея таъкидлаган Лукашенко.

Унинг айтишича, Украинадан Беларусга келган барча фуқаролар батафсил текширувдан ўтказилади. «Бизга келган украиналикларнинг барчасини иш билан таъминлашга ҳаракат қиляпмиз. Аммо Беларусдаги вазиятни издан чиқариш ниятидаги жиноятчилар суқилиб кирмаслиги учун келувчиларни яхшилаб элакдан ўтказамиз. Яшаш ва ишлаш учун бўлса — марҳамат», — дея ўз қарорини изоҳлаган президент.