Тунги соат 23:00 ларда кўча айланишга чиққан 19 ёшдаги икки йигит пойтахтдаги «Аркадий» кафеси ёнига келади. Бироз ўтган-кетганларни кузатиб ўтиради. Шу вақт уларнинг ёнидан дугонасининг туғилган кунидан қайтаётган, вояга етмаган қиз ўтиб қолади-ю, унинг қўлидаги телефон планшет йигитларда қизиқиш уйғотади, деб хабар қилади «Ҳуқуқ» газетаси.
Бир-бирларини кўз қарашлариданоқ тушуниб, қизнинг ортидан йўлга тушади. Қиз қоронғу, одамлар кўзидан холи жойга етгач, йигитлардан бири унинг сумкасига ташланади. Иккинчиси эса қиз қаршилик кўрсатмаслиги учун уни уради. Сумка қўлга киритилгач, икковлон воқеа жойидан қочиб қолади.
Девдек йигитларнинг ҳамласидан ўзини йўқотиб қўйган қиз бироздан кейин ўзига келиб, ички ишлар органларига мурожаат қилади. Олиб борилган тезкор-қидирув жараёнида ёш қизга куч ишлатган «шоввоз»лар қўлга олинди.
Тергов жараёнида айбдорлар жабрланувчига 1 миллион 300 минг сўмлик зарар етказганликлари аниқланди. Улар қизнинг 250 АҚШ долларлик планшетидан ташқари, 500 минг сўм пули, яна бир қанча қимматбаҳо буюмларини ҳам қўлга киритган экан. «Бузоқнинг югургани сомонхонагача», деганларидек, жиноят ортидан бойлик орттирмоқчи бўлган йигитлар узоққа бора олмади.
Жиноят ишлари бўйича Яшнобод туман суди уларга қилмишига яраша жазо тайинлаб, ҳукм чиқарди.
Изоҳ (0)