Россия Ўзбекистонга олиб кетилаётган 126 тонна қуруқ сутни Украинага қайтарди
Россиянинг ветеринар ва санитар назорат бўйича Федерал хизмати («Росселхознадзор») Ўзбекистонга Россия орқали олиб киришга уринилган 126 тонна ёғсизлантирилган қуруқ сутни Украинага қайтарди. Бу ҳақда Федерал хизматнинг Брянск ва Смоленск областлари бўйича бошқармаси маълумотига таяниб, UzDaily хабар бермоқда.
Маълум бўлишича, 19 май куни «Брянск-Лговский» темирйўл ўтказиш пунктига Ўзбекистонга олиб кетилаётган, «Винница «Roshen» сут заводи» ва «Житомир ёғ заводи» томонидан ишлаб чиқарилган, умумий оғирлиги 126 тонна бўлган ёғсизлантирилган қуруқ сутнинг икки партияси келиб тушган.
«Росселхознадзор» мутахассисларининг аниқлашича, юк ташувчилар томонидан тақдим этилган ветеринария гувоҳномаларига мажбурий маълумотлар зарур даражада киритилмаган ва қонун билан белгиланган талаблар бузилгани ҳолда тўлдирилган.
Айни вақтда Ўзбекистон давлат ветеринария хизмати томонидан ўрнатилган талаблар ҳам бузилгани маълум бўлган. Қуруқ сут жўнатувчига қайтарилган.
