Руминияда 18 ёшли қиз поезд томида зўр селфи олишга уриниб, тириклайин ёниб кетди. Бу ҳақда The Mirror хабар бермоқда.
18 ёшли Анна Урсу ва унинг дугонаси Facebook’даги саҳифаси учун вагон томига чиқиб, зўр селфи олиш мақсадида Руминиянинг Ясси шаҳридаги темирйўл бекатига яширинча кирган.
Вагон томига кўтарилган қизнинг қўли тасодифан қизиб турган симга тегиб кетган ва у 27 минг волт кучланишни токни қабул қилган, натижада унинг либоси ёниб кетган. Чақнаш зарби эса қизнинг дугонасини поезд томидан ерга улоқтириб юборган.
Селфига тушиш ихлосманди бўлган қиз танасининг 50 фоиздан ортиғи куйиб кетгани ҳолда касалхонага олиб келинган ва кўп ўтмай шу ерда вафот этган. Унинг дугонаси ҳам куйиш жароҳатини олган, бироқ унинг ҳаётига ҳеч қандай хавф йўқлиги айтилмоқда.
Эслатиб ўтамиз, бу «идеал селфи» олиш истагида бўлганларнинг хоҳиш-истак қурбонига айлангани билан боғлиқ илк ҳолат эмас. Февраль ойида америкалик йигит қайлиғи билан темирйўлда селфига тушмоқчи бўлиб, поезд остида қолиб кетганди. Январь ойи охирида эса Ҳиндистонда худди шунга ўхшаш ҳолатда уч талаба ҳалок бўлганди.
Изоҳ (0)