Бир америкалик оилада 13-ўғил фарзанд дунёга келди

Америкалик Жей ва Катери Швандтлар оиласи аъзолари сони яна биттага кўпайди – 13-ўғил фарзанд дунёга келди. Nur.kz’нинг хабар беришича, бу оилада бирорта қиз фарзанд йўқ.

Мичиган штатининг Grand-Рапидс шаҳрида истиқомат қилувчи Швандтлар оиласининг янги аъзоси чоршанба куни дунёга келди. Оилавий анъанага кўра, эр-хотин бўлажак фарзанд жинсини олдиндан билишга уринмади.

«Агар қиз фарзанд туғилса, қандай аҳволга тушишимни тасаввур ҳам қилолмайман, деб ўйлаётгандим», - деди 40 ёшли Жей Швандт 13-ўғли дунёга келганидан сўнг.

Эр-хотинларнинг тўнғич ўғли Тайлер 22 ёшда, ундан кейингилари – Зак 19, Дрю 18, Брендон 16, Томми 13, Винни 12, Келвин 10, Гейбу 8, Уэсли 6, Чарли 5, Люк 3 ёшда ва Такер 21 ойлик.

Ота-она ҳозирги вақтда янги туғилган чақалоқ исм танлаш устида бош қотирмоқда, бу жараёнда кенжа фарзанднинг акалари ҳам фаол иштирок этишмоқда.

Оилада 14-ўғил фарзанд ҳам дунёга келадими? «Ҳеч қачон ҳеч қачон деманг», - дея файласуфона жавоб берди 13 ўғилнинг отаси.

Олимларнинг сўзларига кўра, бир оилада бир жинсга мансуб 13 боланинг туғилиши 8192 имкониятдан фақат биттасида юз беради.