Америкалик олимлар дунёдаги биринчи иссиқ қонли балиқни топди, деб хабар қилади «РИА Новости».
Чуқур сувларда яшайдиган ой балиқ ажойиб қобилиятга эга. У сутэмизувчилар ва қушлар каби бутун танасини юқори ҳароратда ушлаб тура олади. Ушбу кашфиёт АҚШнинг Калифорния қирғоқларидан унча узоқ бўлмаган жойда океан фаунасини тадқиқ қилиш давомида амалга оширилди.
Ой балиқ кўкрагидаги сузғичларини доимий ҳаракатлантириш эвазига иссиқлик ишлаб чиқаради. Ёғ қатлами ва жабрадаги қон томирларининг бошқача тузилмаси ҳам тана ҳароратини бир меъёрда сақлаб туришга имкон беради.
Ушбу қобилият туфайли улар океаннинг чуқур сувларида бошқа йиртқич балиқларга қарши рақобатлашиши мумкин. Олимлар балиқни тутиб, унинг ҳароратини ўлчади. Ой балиқнинг ўртача ҳарорати улар сузадиган сув ҳароратидан 5 даражага иссиқлиги аниқланди.
Бу турдаги балиқлар океаннинг 50 дан 200 метргача бўлган чуқурлигида, ҳарорат 10 °C дан ошмайдиган сувда яшайди. Улар кичик балиқлар, кальмарлар ва моллюскаларни ейди. Ойбалиқнинг узунлиги 2 метргача, оғирлиги эса 270 килограммгача етиши мумкин.
Изоҳ (0)