АҚШнинг Нью-Йорк шаҳридаги Christie’s аукционида Пабло Пикассонинг картинаси 179,4 миллион долларга сотилиб, энг қиммат санъат асарига айланди, деб хабар қилади «РБК».
«Жазоир аёллари» (Les femmes d’Alger) сурати олдинроқ Christie’s мутахассислари томонидан 140 миллион долларга баҳоланганди. Савдолар 100 миллиондан бошланди, картинага даъвогарлар кескин баҳслардан сўнг нархни 179 365 000 долларга олиб чиқди. Аукционнинг комиссияси 12 фоизни ташкил қилди.
Аввалги рекорд 2013 йилнинг ноябрида Christie’s аукционида Фрэнсис Бэконнинг 142,4 миллионга сотилган уч суратни бирлаштирган асарига тегишли эди.
«Жазоир аёллари» картинаси узоқ вақт америкалик коллекционерлар Виктор ва Салли Гансга тегишли бўлган. Кейин улар суратни лондонлик номаълум коллекционерга сотган. 1997 йилда картинанинг нархи 31 миллион долларни ташкил қилган.
Суратнинг янги эгаси исм-шарифи сир сақланмоқда.
Изоҳ (0)