Ўзбекистонда Сингапур модели асосида иқтисодий зона ташкил этилиши мумкин

Ўзбекистонда Сингапур модели асосида пилот махсус иқтисодий зона ташкил этилиши режалаштирилаётгани маълум қилинди. 

Келтирилишича, Сингапурга ташриф доирасида Ўзбекистон инвестициялар, саноат ва савдо вазири Лазиз Кудратов бошчилигидаги делегацияси Singapore Cooperation Enterprise, Sembcorp Industriyes ва Wilmar International компаниялари раҳбарияти билан учрашувлар ўтказди.

Музокаралар конструктив руҳда кечиб, томонлар ҳамкорликни ривожлантириш бўйича навбатдаги чораларни белгилаб олди. Ўзбекистоннинг махсус иқтисодий зоналарида самарадорликни ошириш дастурини ишлаб чиқиш, бунда “ягона ойна” механизми, унификацияланган бошқарув стандартлари, CRM платформаси ва замонавий инфратузилмани жорий этиш, шунингдек, стратегик инвестицияларни жалб этишга йўналтириш бўйича келишувга эришилди.

Сингапур модели асосида пилот махсус иқтисодий зонани ташкил этиш ташаббуси муҳокама қилинди. Бунинг учун қўшма экспертлар гуруҳи шакллантирилади.

Яна бир муҳим келишувлардан бири — Тошкент вилояти Ўрта Чирчиқ туманида 1 800 иш ўрни яратиш имконини берувчи агросаноат лойиҳасини амалга ошириш бўйича чоралар белгиланди.

Қайд этилишича, ташриф Сингапур ҳамкорларининг узоқ муддатли ҳамкорликка бўлган юқори қизиқиши борлигини намоён этди ҳамда инвестицияларни жалб этиш ва қўшма лойиҳаларни амалга ошириш учун янги истиқболларни очиб берди.