Германиянинг сиёсий партиялари ва сиёсатчилари Украинага хавфсизлик кафолатлари ўт очишни тўхтатиш борасидаги сулҳга эришилгандан кейин муҳокама қилинишини хоҳламоқда. Германиялик сиёсатчилар Америка Қўшма Штатлари президенти Дональд Трамп Украина масаласидаги фикрини бир неча бор ўзгартирганини эслатди. Бу ҳақда DW нашри хабар берди.
Манбага кўра, кўплаб сиёсий партиялар вакиллари Дональд Трампнинг фронт чизиғида ўт очишни тўхтатишдан олдин Украинага хавфсизлик кафолатлари берилиши кераклиги ҳақидаги фикрларини танқидий баҳолаган.
“Хавфсизлик кафолатлари масаласи фақат сулҳ тузилгандан кейин батафсил аниқлаштирилади”, деган Германиядаги ҳукмрон коалицияга кирувчи Германия Социал-демократик партиясининг ташқи сиёсат бўйича вакили Адис Аҳметович.
Мухолифатдаги Яшиллар партияси ҳам хавфсизлик кафолатларини фақат ўт очишни тўхтатиш келишувидан кейин муҳокама қилишга чақирди. “Бу амалга оширилмагунча, хавфсизлик чораларида иштирокни муҳокама қилиш бефойда”, деди Бундестаг мудофаа қўмитасидаги Яшиллар партияси вакили Зара Нанни.
Бундестагда вакилликка эга бўлмаган мухолифатдаги Озод демократик партия (ФДП) эса Трампнинг кейинги қадамларини кутишга чақирган. “АҚШ президенти Украина масаласида кўп нарсаларни эълон қилган, бироқ ҳеч бирини амалга оширмаган. Агар шундай дейиш мумкин бўлса, биз фақат тухум қўйганимиздан кейин қағиллашимиз керак”, деган Европарламент хавфсизлик қўмитаси раиси Мари-Агнес Штрак-Зиммерман.
Бундестагнинг ташқи сиёсат қўмитасидаги Германия ҳукмрон коалициясига кирувчи Христиан-демократик ва Христиан-ижтимоий иттифоқ вакили Родерих Кизеветтернинг сўзларига кўра, Трамп Зеленскийни мажбурий равишда тинчликка эришишга ундамаслиги керак.
“Украина учун ягона ишончли узоқ муддатли хавфсизлик кафолати — НАТОга тўлақонли аъзоликдир. Трамп Зеленскийни мажбурий равишда тинчликка ундамаслиги керак”, деган Кизеветтер.
Сиёсатчининг фикрича, европаликлар Москвага нисбатан кескин позиция тутишлари ва ўз қўшинлари билан Украинадаги сулҳнинг ишончлигини кафолатлашлари лозим. Украинага Германия ҳам ўзининг тинчликпарвар кучларини юбориши керак. Шунингдек, Европа АҚШдан Киевга ядровий мудофаа бўйича ваъда талаб қилиши керак. Германия ташқи ишлар вазири Ёҳанн Вадефул эса Германия қўшинларини Украинага юбориш имкониятини рад этган эди.
АҚШ таклифларини танқид қилган мухолифатдаги Сўл партия ҳам Украинадаги уруш бўйича чиқиш қилди. Партия етакчиларидан бири Ян ван Акеннинг таъкидлашича, Дональд Трампга Украинанинг умуман қизиғи йўқ.
“Трампнинг Украина билан умуман иши йўқ. Германия канцлери Фридрих Мерц эса хато қилмоқда. Чунки АҚШга ишониб бўлмайди. Трамп тез-тез ўз позициясини ўзгартириб туради”, деган Ван Акен.
Сўл партия етакчиси Оқ уйда бўладиган Украина ва Европа саммитини интиқлик билан кутаётганини, бироқ Аляскада бўлиб ўтган учрашув тинчлик музокаралари эмаслигини айтди. Сиёсатчи саммитда Украина иштирок этмаганини таъкидлади. Ван Акеннинг қўшимча қилишича, Трамп Украина масаласида гоҳ олдинга, гоҳ орқага қадам ташламоқда.
Немис сиёсатчиси Украинага тегишли ҳудудларнинг йўқотилишини тан олишга қарши чиқди. Бу жараён давлат Конституциясига кўра, умумхалқ референдуми орқали амалга ошиши мумкин. Шу билан бирга, Сўл партия раҳбари Киевга қурол етказиб берилишига ҳам қарши. Агар қурол етказиш давом этса, Россиянинг ҳарбий тажовузи Грузия, Болтиқбўйи мамлакатлари ва Молдовага ҳам хавф туғдириши мумкин.
Жорий йилнинг 16 август куни Россия президенти Владимир Путин ва АҚШ етакчиси Дональд Трамп Аляскада музокара ўтказди. Бироқ саммитда томонлар ҳеч қандай келишувга эришмади.
Изоҳ (0)