Американинг Нью Мексико штатида яшовчи Данелла Галлегос органларини донорликка олиш операцияси бошланишидан бир дақиқа олдин комадан чиқди. Бу ҳақда Daily Mail хабар берди.
Галлегос 2022 йилда Албукерке шаҳридаги шифохонага ҳушсиз ҳолда олиб келинган. Беморга аниқ ташхис қўйилмагач, у кома ҳолатига тушган. Шифокорлар унинг яқинларига бемор ҳеч қачон ўзига келмаслигини айтишган. Икки йил давом этган хушсизликдан сўнг умидини йўқотган оила New Mexico Donor Services орқали унинг органларини донорликка беришга рози бўлган.
Аммо операция бошланишидан бир неча дақиқа аввал аёлнинг кўзидан ёш чиқа бошлаган ва тўсатдан қўлларини ҳаракатга келтира бошлаган. Шифокорлар буни аввалига рефлектор ҳаракатлар деб ўйлашган, шу сабабли аёлни барибир операция хонасига олиб кетган. Бироқ жарроҳлик амалиёти бошланишига яқин Галлегос шифокорларнинг кўрсатмасига биноан қовоқларини очиб-юма бошлаган.
Шунга қарамай, донорлик хизмати вакиллари ҳамда трансплантация координатори операцияни давом эттириш тарафдори бўлиб, рефлексларни бостириш учун унга морфин юборишни талаб қилган. Аммо жарроҳлар гуруҳи бунга қатъий қарши чиққан ва Галлегосни операция хонасидан олиб чиқиб кетган. Уларнинг бу қарори беморнинг ҳаётини сақлаб қолган.
Данелланинг ўзи журналистларга берган интервьюсида комада ётганида ҳам қўрқувни ҳис қилганини айтди:
“Ўша пайтда танамни қимирлатолмасдим, аммо даҳшатли нарса юз бераётганини аниқ сезардим. Агар ҳаёт белгиларини кўрсатмаганимда эди, нима бўлишини ҳатто тасаввур қилишнинг ўзи қўрқинчли”, деди у.
Ҳозирда Галлегос реабилитация жараёнидан ўтмоқда, шифохонада ички текширув бошланган. Унинг оиласи эса трансплантация маркази ходимларини судга беришга тайёргарлик кўрмоқда. New Mexico Donor Services барча айбловларни рад этиб, “охирги қарор доимо даволовчи шифокорларга тегишли” дея таъкидламоқда.
Изоҳ (0)