КХДР янги баллистик ракетани сув остидан синов тариқасида учирди. Бу ҳақда 9 май, шанба куни Шимолий Корея давлат телеграф агентлиги (КМТА) хабар берди.
Қайд этишларича, ракета мамлакат етакчиси Ким Чен Иннинг шахсий ташаббуси натижасида ишлаб чиқилган. Мамлакат раҳбари ракета учирилишини бевосита сувости кемасидан туриб кузатди. Парвоз айнан қаерда амалга оширилганига аниқлик киритилмаган.
Ўтказилган синовларни Ким Чен Ин сунъий йўлдош учирилишига тенглаштирган. КХДР етакчисининг сўзларига кўра, Шимолий Корея армияси «душман кучларини нишонга олиб, йўқ қила олиш» имкони бор жаҳон даражасидаги стратегик қуролга эга эканлигини кўрсатган.
13 март куни Пхеньян Шарқий Хитой денгизи томон еттита «ер – ҳаво» ракеталарини учиргани ҳақида хабар берилган эди. Синов тариқасида отилган бу ракеталар Жанубий Корея кузатув станциялари томонидан қайд этилган.
Расмий Сеулнинг фикрича, Шимолий Корея ўз чегаралари яқинида Жанубий Корея ва АҚШ армияси томонидан ўтказилаётган биргаликдаги машғулотлардан норозилигини билдириш мақсадида бу ракеталарни учирган.
Изоҳ (0)