АҚШлик энергетика мутахассиси ядро қуроли ҳақидаги махфий маълумотларни ўғирлашга уринди

АҚШ энергетика вазирлигининг собиқ ходими Чарльз Экклстон 2015 йил 20 май куни суд олдида жавоб беради, деб хабар қилади «Корреспондент.net».

У махфий маълумотларни ўғирлаб, четга сотишга уринган. Бундан ташқари, интернет-қаллоблик учун ҳам унга айблов қўйилган. Буларнинг бари учун айбланувчи 20 йилгача қамалиши мумкин.

Экклстон 2010 йилда АҚШнинг ядро қуролини бошқариш комиссиясидан бўшатилганидан сўнг, Филиппинга кўчиб ўтган. Тахминларга кўра, у Хитой ва Венесуэла элчихонасига мурожаат қилиб, мамлакат махфий сирини сотишни таклиф қилган.

Аммо ушбу мамлакатларнинг расмий шахслари ўрнига Федерал қидирув бюроси ходими у билан алоқага чиқди ва ўзини чет мамлакатларидан бирининг вакили қилиб кўрсатди.

ФҚБ агенти бошчилигида америкалик энергетик 80 та электрон манзилга махфий маълумотларни кўчириб оладиган вирус жўнатди. Аслида Экклстоннинг жўнатмаларида вирус бўлмаган, чунки унинг барча ҳаракатларини ФҚБ назорат қилиб турган.

Шундан сўнг тез орада Экклстонни Филиппиннинг ҳуқуқ-тартибот идораси қўлга олди ва 27 март куни АҚШга жўнатиб юборди.