Тошкентда инновацион ғоялар, технологиялар ва лойиҳалар тақдимотининг ҳудудий ярмаркаси ўтказилади

2015 йилнинг 29-30 апрель кунлари Тошкент шаҳар «Кўргазма савдо маркази» кўргазма мажмуасида (Беруний кўчаси,41) Инновацион ғоялар, технологиялар ва лойиҳалар тақдимотининг Тошкент ҳудудий ярмаркаси бўлиб ўтади. Бу ҳақда Тошкент шаҳар ҳокимлиги матбуот хизмати хабар берди.

Кўргазмада Ўзбекистон Республикаси Фанлар акдемиясининг 33 дан ортиқ илмий муассасаси, Олий ва махсус ўрта таълим вазирлиги, Соғлиқни сақлаш вазирлиги, Қишлоқ ва сув хўжалиги вазирлиги, «Ўзбекистон темир йўллари» ДАТК томонидан инновацион технологиялар асосида ишлаб чиқарилган маҳсулотлар тури ўрин олган. Ушбу кўргазмада намойиш этиладиган янги лойиҳалар ва илғор технологиялар Тошкент шаҳрининг 32 та ҳудудий саноат корхонасида амалга татбиқ этилиши кутилмоқда. Ҳудудий ярмаркада 400 та лойиҳа ва улар бўйича 147 та тақдимот, 48 та эҳтиёжманд инновацион ишланма намойиш этилади.

Тошкент шаҳар экспозицияси, асосан, саноат ва коммунал хўжалиги соҳасидаги 26 та ҳудудий корхоналарнинг лойиҳа-тақдимотидан иборат. Тиббий жиҳозлар, электр қувватини тежамлаш технологиялари, янги турдаги қурилиш материаллари, озиқ-овқат маҳсулотлари, даволаш воситалари, зараркунанда ҳашоратларга қарши кураш учун экологик хавфсиз препаратлар, косметик ва гигиеник маҳсулотлар, уй газламалари, кўнгилочар ва реклама индустрияси соҳасидаги янги технологиялар ва бошқалар шулар жумласидандир.

2 кун давом этадиган инновацион лойиҳалар ярмаркасида Тошкент шаҳар ва Тошкент вилоят ҳокимлиги, Ўзбекистон Республикаси Фанлар академиясининг илмий муассасалари, Олий ва ўрта махсус таълим вазирлиги, Соғлиқни сақлаш вазирлиги, «Узелтехсаноат» ассоциацияси, «Ўзбекнефтгаз» МХК, «Ўзбекистон темир йўллари» ДАТК, «Ўзкимёсаноат» ДАК, «Камолот» ЁИҲ, Ўзбекистон Республикаси Савдо-саноат палатаси ва Олмалиқ кон-металлургия комбинатининг тақдимотлари бўлиб ўтади.

Ҳудудий ярмарка иши давомида намойиш этилган янги технологияларни ишлаб чиқаришга жорий этиш самарадорлигини ошириш мақсадида 300 дан ортиқ саноат корхоналари ва 800 дан ортиқ кичик ва хусусий тадбиркорлик субъектлари вакиллари, олий таълим муассасаларининг талабалари, техника йўналишидаги коллеж ўқувчилари ташриф буюриши кутилмоқда. Улар тақдимотларда тингловчилар сифатида иштирок этади.