Яқин келажакда Ўзбекисон Бошқирдистон Республикасида савдо уйини очишни режалаштирмоқда. Бу ҳақда Ўзбекистоннинг Россиядаги Фавқулодда ва Мухтор Элчиси Акмал Камолов Бошқирдистон раҳбари Рустем Хамитов билан учрашув вақтида маълум қилди, деб хабар беради UzDaily.
Рустем Хамитов Бошқирдистон Республикаси Ўзбекистон корхоналари билан ҳамкорлик қилишдан манфаатдор эканлигини айтиб ўтди.
«Сизнинг маҳсулотларингиз бизда катта ҳажмда пайдо бўлиши ва бизнинг маҳсулотларимиз ҳам Ўзбекистон Республикасида тақдим этилиши учун барча ишни қиламиз. Афсуски, сўнгги йилда Ўзбекистон ва бизнинг республикамиз ўртасидаги товар айланмаси деярли икки баробарга камайиб кетди. Бу сизнинг ёқилғи ҳамда турли кимёвий маҳсулотларни камроқ олишни бошлаганингиз билан боғлиқ. Биз иккала томоннинг товар айланмаси ўсиши учун ҳаракат қиламиз», — деди Бошқирдистон раҳбари.
2014 йил якунларига кўра, Бошқирдистон ва Ўзбекистон ўртасидаги товар айланмаси 127,2 миллион долларни ташкил қилди. Бундан 71,6 миллион доллар экспорт, 55,5 миллион доллар эса импорт ҳиссасига тўғри келади.
Айни вақтда Бошқирдистон ҳудудида Ўзбекистон капитали иштирокида очилган 78 та корхона фаолият олиб бормоқда.
Изоҳ (0)