Ўзбекистонда 1 майдан уй-жой-коммунал (УЖК) хизматлар ҳақини тўлаш бўйича энг кам иш ҳақининг табақалаштирилган миқдорида ҳар ойда компенсация пул тўловлари бериладиган шахслар имтиёзли тоифаларининг янги рўйхати амал қилишни бошлайди. Бу Ўзбекистон Президентининг 14 апрелдаги фармонида белгилаб қўйилган, дея хабар бермоқда «Gazeta.uz».
1941-1945 йиллардаги уруш ногиронлари ва қатнашчилари энди энг кам иш ҳақининг 50 фоизи (айни вақтдаги 45 фоиз ўрнига), урушнинг меҳнат фронти қатнашчилари эса 25 фоизи (18 фоиз) миқдорида тўлов пули олишади. Ушбу ўзгаришлар «Кексаларни эъзозлаш йили» Давлат дастурига мувофиқ киритилди.
1941-1945 йиллардаги уруш ногиронлари ва қатнашчиларига тенглаштирилган шахслар, ўзгалар парваришига муҳтож ёлғиз пенсионерлар, Совет Иттифоқи Қаҳрамонлари, Социалистик Меҳнат қаҳрамонлари ва «Слава» орденининг учала даражаси билан мукофотланган шахслар, фашист концлагерларининг собиқ вояга етмаган маҳбуслари, Ленинград шаҳри қамали даврида ишлаган фуқаролар, кўриш қобилияти бўйича I гуруҳ ногиронлари, Чернобил ҳалокати оқибатида жабрланган фуқаролар, ядро полигонлари ва бошқа радиация-ядро объектларида ҳарбий хизматни ўтаган пенсия ёшидаги шахсларга бериладиган тўловлар миқдори 45 фоиз даражасида сақлаб қолинган.
Эслатиб ўтамиз, айнан шу фармонга мувофиқ, ёши 75га тўлган ва ундан ошган фуқаролардан уларга тайинланган пенсия ва нафақаларнинг ҳисобланиши, шунингдек, қонунчиликда кўзда тутилган имтиёзларнинг қўлланилиши тўғрилигини текшириш натижаларига кўра аниқланган ортиқ тўланган пенсия ва нафақалар миқдорида 2015 йил давомида ҳисобдан чиқарилиши, шунингдек, ёши 100га тўлган ва ундан ошган фуқаролар пенсиясига 2015 йил 1 майидан бошлаб ҳар ойда энг кам иш ҳақининг 100 фоизи миқдорида қўшимча тўлов тўлаш ҳам белгиланган эди.
Изоҳ (0)