2015-yilning 29-30-aprel kunlari Toshkent shahar “Ko‘rgazma savdo markazi” ko‘rgazma majmuasida (Beruniy ko‘chasi,41) Innovatsion g‘oyalar, texnologiyalar va loyihalar taqdimotining Toshkent hududiy yarmarkasi bo‘lib o‘tadi. Bu haqda Toshkent shahar hokimligi matbuot xizmati xabar berdi.
Ko‘rgazmada O‘zbekiston Respublikasi Fanlar akdemiyasining 33 dan ortiq ilmiy muassasasi, Oliy va maxsus o‘rta ta’lim vazirligi, Sog‘liqni saqlash vazirligi, Qishloq va suv xo‘jaligi vazirligi, “O‘zbekiston temir yo‘llari” DATK tomonidan innovatsion texnologiyalar asosida ishlab chiqarilgan mahsulotlar turi o‘rin olgan. Ushbu ko‘rgazmada namoyish etiladigan yangi loyihalar va ilg‘or texnologiyalar Toshkent shahrining 32 ta hududiy sanoat korxonasida amalga tatbiq etilishi kutilmoqda. Hududiy yarmarkada 400 ta loyiha va ular bo‘yicha 147 ta taqdimot, 48 ta ehtiyojmand innovatsion ishlanma namoyish etiladi.
Toshkent shahar ekspozitsiyasi, asosan, sanoat va kommunal xo‘jaligi sohasidagi 26 ta hududiy korxonalarning loyiha-taqdimotidan iborat. Tibbiy jihozlar, elektr quvvatini tejamlash texnologiyalari, yangi turdagi qurilish materiallari, oziq-ovqat mahsulotlari, davolash vositalari, zararkunanda hashoratlarga qarshi kurash uchun ekologik xavfsiz preparatlar, kosmetik va gigiyenik mahsulotlar, uy gazlamalari, ko‘ngilochar va reklama industriyasi sohasidagi yangi texnologiyalar va boshqalar shular jumlasidandir.
2 kun davom etadigan innovatsion loyihalar yarmarkasida Toshkent shahar va Toshkent viloyat hokimligi, O‘zbekiston Respublikasi Fanlar akademiyasining ilmiy muassasalari, Oliy va o‘rta maxsus ta’lim vazirligi, Sog‘liqni saqlash vazirligi, “Uzeltexsanoat” assotsiatsiyasi, “O‘zbekneftgaz” MXK, “O‘zbekiston temir yo‘llari” DATK, “O‘zkimyosanoat” DAK, “Kamolot” YoIH, O‘zbekiston Respublikasi Savdo-sanoat palatasi va Olmaliq kon-metallurgiya kombinatining taqdimotlari bo‘lib o‘tadi.
Hududiy yarmarka ishi davomida namoyish etilgan yangi texnologiyalarni ishlab chiqarishga joriy etish samaradorligini oshirish maqsadida 300 dan ortiq sanoat korxonalari va 800 dan ortiq kichik va xususiy tadbirkorlik subyektlari vakillari, oliy ta’lim muassasalarining talabalari, texnika yo‘nalishidagi kollej o‘quvchilari tashrif buyurishi kutilmoqda. Ular taqdimotlarda tinglovchilar sifatida ishtirok etadi.