Ўзбекистонда StartupFactory.uz акселератори иш бошлади

Ўзбекистонда стартап саноати эндигина ривожланишни бошламоқда. Бизда ҳали йирик стартаплар, акселераторлар йўқ, стартап экотизими иштирокчиларининг муносабатлари тартибга солинмаган. StartupFactory.uz акселератори бу йўналишда дастлабки қадамларни ташлаб, Ўзбекистонда ИТ-стартаплар учун илк акселератор бўляпти.

Акселерация дастури нимадан иборат?

Сиз акселераторга ўз лойиҳангиз билан келасиз, биз эса офис ва ходимлар тақдим этамиз, Леан Startup, бизнес-таҳлил, маркетинг, PR соҳасидаги энг яхши экспертларни жалб қиламиз, маҳсулотнинг илк фойдаланувчиларини излаймиз, илк сотувни амалга оширамиз, барча юридик, молиявий, бухгалтерлик ва ташкилий масалалар бўйича маслаҳатлар берамиз, сармоячилар учун тақдимотлар тайёрлашда ёрдам берамиз.

Акселераторнинг ишлаб чиқилган дастури ёрдамида стартап уч ой давомида бошқа шароитларда олти-ўн ойда ўтадиган йўлни босиб ўтади.

«Қандай бўлиши керак?» мавзусидаги маслаҳатлардан ташқари акселератор менторлари кўплаб бошловчи тадбиркорлар йўл қўядиган бир қанча хатолар тўғрисида батафсил сўзлаб берадилар.

Акселерация дастури якунида стартаплар энг яхши лойиҳаларга сармоя киритишга тайёр бўлган инвесторларга намойиш этилади.

Қандай лойиҳалар иштирок этиши мумкин?

Дастурда қатнашиш учун интернет ва мобил технологияларга боғлиқ бўлган B2C ва B2B лойиҳаларни таклиф этамиз. Бу сайтлар, мобил иловалар, электрон тижорат хизматлари, персоналлаштирилган сервислар бўлиши мумкин.

Саралашнинг асосий мезонлари − лойиҳанинг Ўзбекистон бозорига йўналтирилганлиги, амалга ошириш имконияти, инновация, рақобатчилардан фарқи, ҳажмлилиги, тижорийлиги, лойиҳа асосчисининг мақсадга интилиши ва иш қобилияти.

Аризаларни қабул қилиш 20 майгача давом этади.

Биз Ўзбекистон қонунчилигини бузадиган лойиҳалар билан ишламаймиз.

Startаплар бундан нима олади?

1. Иш учун инфратузилма (шаҳар марказидан офис, барча алоқа воситалари билан)
2. Юридик, бухгалтерлик ва кадрлар бўйича кўмак (бизда техник мутахассислар, дастурчилар ва дизайнерлар бор)
3. Алоҳида бириктирилган трекерлар (ҳар ҳафта сиз билан учрашиб, лойиҳани ривожлантиришга ёрдам берадиган ва йўналтирадиган экспертлар)
4. Лойиҳаларнинг бизнес таҳлили
5. Менторлар билан ишлаш. Бизнеснинг турли йўналишлари бўйича экспертларнинг мастер-классларида иштирок этиш
6. Нетворкинг (Ўзбекистон ИТ-бозорининг энг яхши экспертлари билан алоқалар)
7. Реклама ва лойиҳани интернетда илгари суриш
8. Сармоядорлар эътибори (якуний тақдимотда, Demo кунида)

Юқорида саналган барча хизматларни акселератор лойиҳадаги улуш эвазига тақдим этади. Ҳар бир стартап билан улуш масаласи алоҳида муҳокама қилинади. Одатда, жаҳон тажрибасида акселераторнинг улуши 7−10 фоизни ташкил этади. Startаплар учун иштирокнинг мажбурий шарти − акселерация шартномасини имзолаш.

Дастурга аризани StartupFactory.uz сайти орқали топшириш ва акселераторнинг Facebook’даги саҳифаси орқали саволлар бериш мумкин.

Лойиҳа муаллифи Brand.uz