Селфи таёқчаси «японларнинг эски бефойда кашфиёти» бўлиб чиқди

Илк селфи таёқчаси смартфонлар ва умуман «селфи» атамасининг ўзи пайдо бўлишидан анча аввал – 1983 йили Японияда кашф этилиб, сотувга чиқарилган. Бу ҳақда «Корреспондент.net» хабар бермоқда.

Minolta фирмаси 1983 йили Minolta Disc-7 фотокамерасини бозорга чиқарган – экспертларнинг фикрича, бу қурилма ўз давридан анча илгарилаб кетганди.

Дискли плёнкада ишлайдиган бу фотоаппаратдаги аксарият деталлар уни ўзига хос қилиб кўрсатган, хусусан, унинг олд панелида автопортретлар олишда махсус қўлланиладиган кичик қабариқ кўзгуси бор эди.

Бироқ илк селфи таёқчаси ҳозиргидан фарқли – Minolta Extender («кенгайтирувчи») деб номланган ва масофадан туриб суратга олиш имконини берадиган затвор тугмаси билан бир тўпламда сотилган.

Эътиборли томони, ушбу ускуна 1995 йили нашрдан чиққан «Японларнинг 101 бефойда кашфиёти» китобидан ҳам ўрин олган.

Қайд этиш жоиз, сўнгги вақтларда қатор муассасаларда, хусусан, турли концерт заллари, музейларда селфи таёқчаларидан фойдаланиш тақиқланмоқда.