АҚШ Миллий хавфсизлик агентлиги SIM-карта ишлаб чиқарувчи компанияга хакерлик ҳужуми уюштириб, миллионлаб абонентларни кузатгани маълум бўлди

АҚШ Миллий хавфсизлик агентлиги дунёдаги энг йирик SIM-карта ишлаб чиқарувчи Gemalto компаниясининг ички тизимини бузиб, уяли алоқа компанияларидан махфий равишда миллионлаб абонентлар трафикларини кузатган. Бу ҳақда Эдвард Сноудендан олинган махфий ҳужжатларга таяниб, The Intercept нашри маълум қилди, деб ёзади TJournal.

2010 йилги ҳужжатга кўра, МХА ва Ҳукумат алоқалари маркази (Британия махсус хизмати) Голландиянинг кредит карта чиплари ва йилига 2 миллиардга яқин мобил телефонлар  SIM-карталари ишлаб чиқарувчи Gemalto компанияси ички тармоғини бузиб кирган.

Натижада махсус хизматлар дунё бўйича 450 га яқин уяли алоқа операторлари абонентларини кузатиш имкониятига эга бўлган.

Gemalto вице-президенти Пол Беверли сўзларига кўра, на у ва на бошқа ходимлар бундай хакерлик ҳужумидан шубҳаланмаган.

Ҳаттоки, нашр Gemalto вакилларига мурожаат қилганидан сўнг ҳам компания хавфсизлик хизмати узоқ вақт давомида ҳужум изларини топа олмаган.