AQSh Milliy xavfsizlik agentligi SIM-karta ishlab chiqaruvchi kompaniyaga xakerlik hujumi uyushtirib, millionlab abonentlarni kuzatgani ma’lum bo‘ldi

AQSh Milliy xavfsizlik agentligi dunyodagi eng yirik SIM-karta ishlab chiqaruvchi Gemalto kompaniyasining ichki tizimini buzib, uyali aloqa kompaniyalaridan maxfiy ravishda millionlab abonentlar trafiklarini kuzatgan. Bu haqda Edvard Snoudendan olingan maxfiy hujjatlarga tayanib, The Intercept nashri ma’lum qildi, deb yozadi TJournal.

2010-yilgi hujjatga ko‘ra, MXA va Hukumat aloqalari markazi (Britaniya maxsus xizmati) Gollandiyaning kredit karta chiplari va yiliga 2 milliardga yaqin mobil telefonlar  SIM-kartalari ishlab chiqaruvchi Gemalto kompaniyasi ichki tarmog‘ini buzib kirgan.

Natijada maxsus xizmatlar dunyo bo‘yicha 450 ga yaqin uyali aloqa operatorlari abonentlarini kuzatish imkoniyatiga ega bo‘lgan.

Gemalto vitse-prezidenti Pol Beverli so‘zlariga ko‘ra, na u va na boshqa xodimlar bunday xakerlik hujumidan shubhalanmagan.

Hattoki, nashr Gemalto vakillariga murojaat qilganidan so‘ng ham kompaniya xavfsizlik xizmati uzoq vaqt davomida hujum izlarini topa olmagan.