Ўзбекистонда сайлов қонунчилиги ҳамда Марказий сайлов комиссияси томонидан тасдиқланган Ўзбекистон Республикаси Президенти сайловига тайёргарлик кўриш ва уни ўтказиш бўйича асосий тадбирлар дастури талаблари асосида бўлажак сайловга изчил ҳозирлик кўрилмоқда. Бу ҳақда Марказий сайлов комиссияси расмий сайтида хабар берилди.
Маълумки, Ўзбекистонда фаолият юритаётган барча сиёсий партиялар сайлов қонунчилигига мувофиқ, шунингдек, улар томонидан тақдим қилинган ҳужжатлар асосида Ўзбекистон Республикаси Президенти сайловида иштирок этишга ижозат олди.
Ҳозирги кунда Тадбиркорлар ва ишбилармонлар ҳаракати — Ўзбекистон Либерал-демократик партияси, Ўзбекистон Халқ демократик партияси, Ўзбекистон «Миллий тикланиш» демократик партияси ҳамда Ўзбекистон «Адолат» социал-демократик партияси томонидан Ўзбекистон Республикаси Президентлигига кўрсатиладиган номзодларни қўллаб-қувватловчи сайловчилар имзоларини тўплаш жараёни олиб борилмоқда.
ЎзЛиДеП вакиллари қайд этишича, ҳозирги кунда ҳар бир ҳудудий партия кенгаши ҳузурида сайловчилар имзоларини тўплашга масъул бўлган ишчи гуруҳлари ташкил қилинган.
ЎзХДП фаоллари эса имзо варақалари ўз вақтида тўлдирилиши ва тақдим қилиниши, бунда республиканинг барча маъмурий-ҳудудий тузилмаларини қамраб олишга алоҳида эътибор қаратмоқда.
Ўзбекистон «Миллий тикланиш» демократик партияси аъзолари таъкидлаганидек, имзо тўплаш жараёнида сайловчиларга имзо варақаларини тўлдиришга доир қонун талаблари, хусусан, бу жараёнда иштирок этиш ихтиёрийлик асосида амалга оширилиши тушунтирилмоқда.
«Адолат» СДП аъзолари ва фаоллари таъкидлашича, партия томонидан Ўзбекистон Республикаси Президентлигига кўрсатиладиган номзодни қўллаб-қувватлаш юзасидан сайловчилар имзоларини тўплаш сайлов кампаниясининг масъулиятли босқичи ҳисобланади.
Сиёсий партия томонидан Марказий сайлов комиссиясига тақдим этилган имзо варақалари Ўзбекистон Республикаси жами сайловчиларининг умумий сони камида беш фоизининг, камида саккизта маъмурий-ҳудудий тузилма сайловчиларининг имзоларини қамраб олган бўлиши керак.
Бунда маъмурий-ҳудудий тузилмалардан бирида, яъни Қорақалпоғистон Республикаси, ҳар бир вилоят, Тошкент шаҳрида сиёсий партия имзолар умумий миқдорининг кўпи билан саккиз фоизини тўплаши мумкин.
Сайловчилар фақат битта номзодни қўллаб-қувватлаб, бир мартагина имзо қўйишга ҳақли. Бунда сайловчи ўз фамилиясини, исмини, отасининг исмини, туғилган йилини (ёши 18 да бўлса, қўшимча равишда туғилган куни ва ойини), яшаш жойи манзилини, паспортининг серияси ва тартиб рақамини, шунингдек, имзо қўйган санани кўрсатади.
Имзо варақаларини имзо тўплаган шахс ўз фамилиясини, исмини, отасининг исмини, яшаш жойи манзилини, паспортининг серияси ва тартиб рақамини кўрсатган ҳолда, шунингдек, тегишли сиёсий партиянинг туман, шаҳар тузилмаси раҳбари тасдиқлайди.
Сайловчилар имзоларини тўплаш иш, хизмат, ўқиш, яшаш жойида, сайловолди тадбирларида олиб борилмоқда.
Сайловчиларнинг имзоларини тўплаш жараёни давом этмоқда.
Изоҳ (0)