Қуръа пайтида «Локомотив» устози ПФЛ раҳбари билан тортишиб қолди

Бугун, 17 декабрь куни олий лиганинг 2015 йилги мавсуми учун қуръа ташлаш маросими бўлиб ўтди, деб хабар беради «Stadion.uz».

Қуръа ташлаш маросимида кутилмаган бир воқеа рўй берди. ПФЛ етакчи мутахассиси Валерий Лёткин қуръа ташлаш тартибини тушунтира бошлаганида «Локомотив» устози Вадим Абрамов бунга эътироз билдирди. Яъни, тақвим ўтган йилгидек тузилишига қарши эканлигини маълум қилди.

Ўтган мавсумга қадар олий лига тақвими «кўзгули» («зеркалний») тартибда тузиб чиқиларди. Аниқроғи, 1-турда тўқнаш келган клублар мавсумнинг сўнгги турида ҳисоб-китоб қилар эди. Ўтган йилдан бошлаб бу тартиб ўзгарди. Энди 1-турда учрашадиган жуфтликлар иккинчи давранинг биринчи ўйинида яна тўқнаш келади. Маълум бўлишича, Вадим Карленовичга бу ёқмаган.

Абрамов эътироз билдира бошлагач, орага ПФЛ директори Фарҳод Магометов қўшилди. Фарҳод Абдуалиевич Карленовичга эътироз билдириб, бу борада ўтган йили клуб мутасаддиларидан розилик олганлигини таъкидлади. Абрамов эса ўтган йили йўқлигини рўкач қилди. Шу тариқа иккала мутахассис бироз сўзлар билан «жанг» ўтказиб олди. Магометов бундан муаммо ясамаслик лозимлигини уқтирса, Абрамов ўз фикрини айтаётганлигини, бунга ҳаққи борлигини таъкидлашдан тўхтамади. Гапнинг орасида Абрамов Магометовга «мен сизга гапирганим йўқ, ўзингиз гапга аралашиб муаммо кўтаряпсиз», — деган гапларни билдирди.

Шундан сўнг муаммо бошқача услубда ечилди. Валерий Лёткин барча клуб раҳбарларининг фикрларига қизиқди. Сўров натижасига кўра, бешта жамоа мутасаддилари тақвим «кўзгули» тизимда тузилиши тарафдори эканлигини билдирди. Қолган 11 та жамоа вакили эса ўтган йилги тизим сақланиб қолишини лозим кўрди. Шу тариқа Абрамовнинг эътирози эътирозлигича қолиб кетди.