2015 йилда Toyota ва Honda компаниялари водород двигателида ҳаракатланадиган автомобилларни биринчи марта серияли ишлаб чиқаришга ваъда берди. Бу ҳақда Vesti.ru хабар бермоқда.
Водородда юрадиган транспорт технологияси оддий ички ёниш двигателларидан биринчи навбатда ўзининг экологик тозалиги билан фарқ қилади. Бунда ҳавога чиқариладиган ягона чиқинди сув буғидир. Бироқ танқидчилар табиий газдан водород олиш чоғида иссиқхона буғлари ажралиб чиқишини, улар глобал исишни келтириб чиқаришини таъкидламоқда.
Стэнфорд университети олимлари эса яқин орада автомобилларга қуйиладиган водород зарарсиз усулда олина бошлашини тахмин қилмоқда. Тадқиқотчилар «бармоқсимон» батарейкаларда ишлайдиган арзон қурилмани ишлаб чиқишди, у сувни электролизлаш, яъни уни водород ва кислородга парчалаш йўли билан табиатга зарар етказмаган ҳолда водород ишлаб чиқаради. Бунга ўхшаш бошқа генераторлардан фарқли равишда янги қурилма электродлари қимматбаҳо металлардан эмас, оддий темир ва никель аралашмасидан ишланган.
«Бир неча ўн йиллардан буён олимлар юқори фаолликка эга ва узоқ йиллар давомида хизмат қиладиган арзон электр катализаторларни яратишга уринмоқда, — деди кимё профессори Хуцзе Дай. — Шунинг учун никель асосидаги электродлар худди платина каби самарали эканлиги ҳақидаги кашфиётимиз кутилмаган ҳодиса бўлди».
Келажакда бундай электродлар водород ёқилғисини ишлаб чиқарувчиларга бугунги кунда электр энергиясига сарфланаётган миллиардлаб маблағларни тежаб қолиш имконини беради.
Айни пайтда ушбу ускуна муаллифлари унинг хизмат муддатини узайтиришга ҳаракат қилмоқда. Электродлар анча мустаҳкам бўлса-да, вақт ўтиши билан парчаланади. Жорий версияда улар бор-йўғи бир неча кун давомида тўхтовсиз ишлаши мумкин. Шу билан бирга, олимлар жараённи янада экологик қилиш учун қуёш батареяларида ишлайдиган водород генераторини яратишни режалаштирмоқда.
Нашрнинг қўшимча қилишича, қурилма ёрдамида водороддан ташқари, саноатда муҳим рол ўйновчи газсимон хлор ва натрий гидроксиди ҳам олиш мумкин.
Изоҳ (0)