Германиянинг АDАC клуби автомобиль бошқариш пайтида мобил телефондан Hands Free қурилмасисиз фойдаланганлик учун солинадиган жарима миқдори бўйича Европа давлатлари рейтингини эълон қилди. Бу ҳақда Bibi.uz хабар берди.
Маълум бўлишича, бундай жарималар миқдори турли давлатларда турлича бўлиб, баъзиларида улар бир-биридан кескин фарқ қилади. Масалан, бундай қоидабузарлик учун Босния ва Герцеговинада ҳайдовчилар энг кам — атиги 10 евро жаримага тортилади. Рулда телефондан фойдаланганлик учун катта бўлмаган жарималар Латвия (15 евро), Болгария, Мальта, Сербия ва Туркияда (25 евродан) ҳам кузатилади.
Россия ва Литвада бундай қоидабузарлик 30 еврога тушади.
Машина бошқариш вақтида телефонда сўзлашганлик учун энг катта жарима эса Нидерландияда тўланади — 230 евро. Шунингдек, Дания (200 евро), Испания (200 евро), Италия (160 евро) ва Норвегия (160 евро)да ҳам бундай қоидабузарлик қимматга тушади.
Ўзининг хавфсиз кўчалари билан машҳур бўлган Швецияда эса рулда пайти мобил телефондан фойдаланганлик учун тўғридан-тўғри жарима мавжуд эмас. Бироқ ҳайдовчи суҳбат чоғида авариявий ҳолатни юзага келтирса, у жавобгарликка тортилиб, 170 евро тўлашига тўғри келади.
Таъкидлаш жоиз, кўпгина Европа давлатларида бундай қоидабузарлик учун ўртача 60 евро жарима жорий қилинган.
Изоҳ (0)