Radar.uz лойиҳаси йўллардаги вазият юзасидан иккинчи мониторингни ўтказди. Бу сафарги ўрганиш ишлари «Қозоғистон» кинотеатри яқинидаги пиёдалар ўтиш жойида олиб борилди.
Radar.uz лойиҳаси кўнгиллилари Тошкент шаҳри йўлларидаги вазият юзасидан навбатдаги мониторингни ўтказди. Мониторинг объекти сифатида Амир Темур кўчасининг «Қозоғистон» кинотеатри ва Юнусобод тумани ҳокимлиги оралиғидаги қисмида жойлашган пиёдалар ўтиш жойи танланди.
Ушбу пиёдалар ўтиш жойининг ўйлаб ташкил қилинмагани ва айниқса хавфли эканлиги ҳақида хулоса чиқариш учун бир нигоҳнинг ўзи етарли (қарама-қарши қатнов қисмлари металл тўсиқ билан ажратиб чиқилган Амир Темур кўчасида эса бундай ўтиш жойлари кўплаб топилади). Волонтёрлар объектда бир соат (18:00дан 19:00гача) давомида ўрганиш олиб боришди. Натижалар қуйидагича бўлди:- Юнусобод томонга кетишда – 409 автомобиль пиёдаларни қўйиб юбормади;
- шаҳар марказига кетишда – 180 автомобиль пиёдаларни қўйиб юбормади.
- Пиёдалар ўтиш жойига яқин чорраҳада Юнусободга кетиш йўналишида светофорнинг яшил чироғи ёнганида машиналарнинг катта оқими келади ва пиёдаларни деярли қўйиб юбормайди;
- Алоҳида ҳолатларда битта, чапдаги энг охирги бўлакдаги автомобиль тўхтаб, пиёдага йўл берганида ва пиёда йўлни кесиб ўтишни бошлаганида, қолган бўлаклардаги автомобиллар ҳаракатни давом эттираверди. Бу ҳолат пиёдани яна ортга қайтиб, йўл четида туришга мажбур қилди, тўхтаган автомобиллар эса ҳаракатни давом эттиришди;
- Йўл ўртасида тўсиқлар орасида турган пиёдаларни ҳайдовчилар кўришмаяпти. Пиёдалар қатнов қисмига чиқиб, ўзларини кўрсатишга ҳайиқишади, чунки машиналар жуда тез ва тўсиққа жуда яқин ҳаракатланишади;
- Юнусобод томонга кетаётган автобуслар бевосита пиёдалар ўтиш жойи устида тўхтайди (фотога қаранг). Шу сабаб пиёдалар автобусни айланиб ўтган ҳолда пиёдалар ўтиш жойига чиқиши керак. Бу ҳолатда ҳам ҳайдовчилар пиёдаларни ўтказиб юбормаяпти;
- Пиёдалар ушбу ўтиш жойида ўзларини хавфсиз ҳис қилишмайди – автомобиллар пиёдага йўлни хотиржам кесиб ўтишга ҳам қўймай, баъзан пиёдадан бир неча сантиметр масофада тургани ҳолда ҳаракатни бошлайди.
Хулосалар
Агар ўқувчи ушбу маълумотларни ўқиб, биринчи навбатда ҳайдовчиларни маданиятсизликда ва ҳаракатнинг бошқа иштирокчиларига нисбатан ҳурматсизликда айбласа, бунинг ҳайрон қоларли жойи йўқ. Бу фикр билан баҳслашиш қийин. Бироқ, келинг, вазиятга бошқа томондан назар ташлаб кўрамиз.Энг юқори тезлик соатига 70 километргача рухсат берилган йўлда ҳайдовчи нима қилади? Тўғри – автомобили ҳаракатини айнан шу тезликка олиб чиқади. Бундай тезликда келаётган автомобилнинг йўлидан кутилмаганда тартибга солинмаган пиёдалар ўтиш жойи бутун бир пиёдалари билан чиқиб қолса-чи (куннинг қоронғи вақтида вазият янада оғирлашади)? Ё ҳаракатни давом эттириши, ё кескин тормозланиши керак – бунда баъзан хавфли вазиятлар ҳам юзага келади.
Ўз-ўзидан, пиёдалар ўтиш жойларини ташкил қилиш масаласида ёндашувларни қайта кўриб чиқиш ҳақида ўйлаб кўриш керак. Фикримизча, бир томонга қатнов қисми тўртта ҳаракатланиш бўлагидан иборат ва ҳайдовчига теварак-атроф кўринишини чеклайдиган тўсиқлари бор кўчаларда «хавфсизлик оролчалари»сиз тартибга солинмаган пиёдалар ўтиш жойларининг бўлиши мумкин эмас.
Ечимлар
Кўрсатилган пиёдалар ўтиш жойида (шунингдек, Амир Темур кўчасининг барча ўтиш жойларида, хусусан, вазият шунга ўхшаш бўлган Шаҳрисабз, Навоий кўчаларида ҳам) хавфсизликни оширишга бир қатор оддий чоралар ёрдам берган бўларди.Пиёдалар хавфсизлигини бир неча бор ошириши мумкин бўлган энг самарали ечим – ишлаш режими яхши ўйлаб чиқилган ва йўл ўртасида ҳам бошқарув тугмалари бўлган бошқариладиган светофорларни ўрнатишдир.
Бундан ташқари, қуйидаги чораларни кўриб чиқиш керак:
- Ҳайдовчиларни олдинда пиёдалар ўтиш жойи борлигидан огоҳлантирувчи белгини (1.20 белгиси)ни ўрнатиш;
- «Пиёдалар ўтиш жойи» (5.16.1 ва 5.16.2 белгилари) белгиларини янада кўринарли ҳолатга келтириш. Кўпинча ўтиш жойи ҳақида битта белгидан бошқа ҳеч нарса огоҳлантирмайди;
- Пиёдалар ўтиш жойларининг ёритилишини яхшилаш. Бевосита пиёдалар ўтиш жойи устида қўшимча чироқлар ўрнатиш;
- Ёзувли ахбороти (масалан, «Диққат, пиёдалар!», «Тезликни камайтир!» ва ҳ.к.) бўлган қўшимча йўл белгиларини ўрнатиш.
Қўшимча муҳокама, ўрганиш ва ҳисоб-китобларни талаб қиладиган нисбатан жиддий чоралар:
- Пиёдалар ўтиш жойига яқинлашишда тезликни чеклаш (3.24 ва 3.25 белгилари).
- Бу каби ўтиш жойлари яқинидаги металл тўсиқ секцияларини пиёдаларни узоқдан кўриш имконини берувчи тўсиқларга алмаштириш.
- Сиғимли хавфсизлик оролчалари ёки майдончаларини ташкил қилиш (бунда хориж тажрибаси фойдали бўлиши мумкин).
- Йўл қатнов қисмидаги ҳар бир ҳаракатланиш бўлагига ётиқ чизиқ белгиларини қўйиш (масалан: «Секин» ёзуви, «Пиёдалар ўтиш жойи» белгиси, «Максимал тезлик чекланган» белгиси).
Изоҳ (0)