Украина президенти Пётр Порошенко еттинчи чақириқ Украина Олий Радаси ваколатини муддатидан аввал тўхтатиш ҳақида буйруқ чиқарди, дея хабар берди «Сегодня».
«Мен еттинчи чақириқ Олий Рада ваколатларини муддатидан аввал тугатишга қарор қилдим», — дейилади президентнинг расмий Твиттерида.
Нашрнинг эслатишича, 24 июль куни Олий Радада УДАР ва «Свобода» фракциялари коалициядан чиқишини эълон қилди, бу муддатидан аввалги парламент сайловлари учун йўл очиб берди.
Конституцияга мувофиқ, парламентда янги коалиция тузиш учун депутатларда 30 кун муддат бор эди. Ушбу муҳлат 24 августга ўтар кечаси тугади.
Шу вақтдан бошлаб президентда Радани тарқатиб юбориш ва муддатидан аввалги парламент сайловларини белгилаш учун барча асослар пайдо бўлди. Прогнозларга кўра, сайловлар 26 октябрда бўлиб ўтиши мумкин.
Изоҳ (0)