Путин ҳеч қайси ижтимоий тармоқ ёпилмаслигини маълум қилди

Россия президенти Владимир Путин мамлакат ҳукумати ижтимоий тармоқларни ёпмоқчи эмаслигини билдирди. Бу ҳақда «РИА Новости» хабар берди.

Петербург халқаро иқтисодий форуми ялпи мажлисида Россияда Facebook, Twitter ёки бошқа ижтимоий тармоқлар ёпилиш-ёпилмаслиги ҳақидаги саволга жавобан, Владимир Путин «Биз ҳеч нарсани ёпмоқчи эмасмиз», — дея таъкидлади.

«Бундай фаолиятни амалга оширганларни танқид қилишга ҳаққимиз бор, деб ўйламаймиз. Бунда ҳар бир мамлакатнинг ўз миллий хусусиятларидан келиб чиққан сабаблари бўлиши мумкин. Бироқ биз бундай хатти-ҳаракатни амалга оширмоқчи эмасмиз», — деди Путин.

Унинг айтишича, Россияда замонавий коммуникация воситаларини ривожлантириш режалаштирилмоқда.

«Умид қиламанки, биз асосий коммуникация воситаси Калашников автомати бўлган даврларга қайтмаймиз», — дея қўшимча қилди у.

Аввалроқ Россия назорат қўмитаси (Алоқа, ахборот технологиялари ва оммавий коммуникация соҳасида назорат бўйича федерал хизмат) раҳбари ўринбосари Максим Ксензов мамлакатда Twitter ва Facebook’ни ёпиб қўйишлари мумкинлиги ҳақида баёнот берган эди. «Ижтимоий тармоқларни блоклаб қўйишда ҳеч қандай рискни кўрмаяпман», — деган эди у.

Бунга Twitter Россия ҳудудида тақиқланган маълумотни ўчириб ташлаш талабини тезкорлик билан бажармаганини сабаб қилиб келтирган эди.

Унга жавобан, бош вазир Дмитрий Медведев ижтимоий тармоқларнинг фаол фойдаланувчиси сифатида Россия қонунчилигига тармоқлар ҳам, фойдаланувчилар ҳам риоя қилиши керак, деб ҳисоблашини билдирди. «Бироқ соҳа тараққиётига жавобгар бўлган баъзи мансабдор шахслар вақти-вақти билан калласини ишлатиши ва ижтимоий тармоқлар ёпилиши ҳақида эълон қилувчи интервьюларни бермаслиги керак», — деб ёзган у.