Ғарбий Урал машинасозлик концерни президенти Александр Поздеев Ўзбекистонда ҳуқуқни муҳофаза қилиш органлари қарори билан ҳибсдан озод этилди. Айни пайтда у ўз ватанига қайтиб борган, дея хабар берди Gazeta.uz «РИА Новости» маълумотига таяниб.
Аввалроқ Тошкентдаги суд «Ғарбий Урал машинасозлик концерни» ЁАЖ президенти россиялик Александр Поздеевга нисбатан қўлланилган қамоқда сақлаш чорасини ҳеч қаёққа чиқиб кетмаслик тўғрисидаги тилхат билан алмаштиргани хабар берилган эди.
Россия Федерациясининг Ўзбекистондаги элчихонаси иқтисодий масалалар бўйича маслаҳатчиси Вадим Чекмазовнинг айтишича, РФ элчихонаси ходимлари у билан учрашган. «Поздеевнинг соғлиғи яхши эмас, у шифохонада ётиб даволаниши керак», — деди у.
Жиноят иши ҒУМК томонидан амалга оширилган шартномалар нархини оширганлик бўйича қўзғатилган. Айни пайтда ҒУМК Ўзбекистонда умумий қиймати 200 миллион долларга тенг лойиҳаларни амалга оширмоқда.
Поздеев калий заводи бўйича жиноий иш юзасидан Ўзбекистон Бош прокуратурасига терговга чақирилган, шундан сўнг ҳибсга олинган.
2010 йил сентябрида ҒУМК Қашқадарё вилоятидаги Деҳқонобод калий ўғитлари заводи учун хомашё қазиб чиқариш мажмуасини қуриб берган. Унинг йиллик қуввати 1 миллион тонна рудага тенг бўлиб, лойиҳа қиймати 60 миллион долларни ташкил этган.
2015 йил бошигача компания ушбу завод учун узунлиги 30 километрли юк ташувчи дор йўлини қуриб битказишни режалаштирган эди.
Изоҳ (0)