Toshkentda “zakladchik”larni kaltaklagan 14 nafar shaxsga sud hukmi o‘qildi

Toshkent shahar jinoyat ishlari bo‘yicha Yakkasaroy tuman sudida “zakladchik”larni kaltaklagan 14 nafar shaxsga nisbatan sud hukmi o‘qildi.

2023-yilning fevral oyida narkotik modda egasini aldab, narkotikni o‘zlashtirib oluvchi “zakladchik”lar 17 nafar shaxs tomonidan kaltaklangan edi. 

UzNews nashrining yozishicha, 30-may kuni Toshkent shahar jinoyat ishlari bo‘yicha Yakkasaroy tuman sudida Jinoyat kodeksining 28, 273-moddasi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek, ularni qonunga xilof ravishda o‘tkazish) 4-qismi “b” bandi, 277-moddasi (bezorilik) 2-qismi “a, b, v, d” bandlari, 137-moddasi (odam o‘g‘irlash) 2-qismi “a,b,v” bandlari va 130-1-moddasi (tazyiqni, zo‘ravonlikni yoki shafqatsizlikni targ‘ib qiluvchi mahsulotni tayyorlash, olib kirish, tarqatish, reklama qilish, namoyish etish) 2-qismi “b” bandida nazarda tutilgan jinoyatlarni sodir etganlikda ayblanayotgan 14 nafar shaxsga nisbatan sud hukmi o‘qilgan.

Unga ko‘ra, sudlanuvchi A.B. 6 yilga, sudlanuvchilar N.I. va M.A. 5 yil-u 6 oyga, sudlanuvchi M.F. 5 yilga, sudlanuvchilar T.Sh., F.S., A.S. va Z.X. 4 yil-u 6 oyga, sudlanuvchilar J.Sh., M.J., M.S., T.N., K.A. va B.Sh.ga nisbatan 3 yil 6 oyga ozodlikdan mahrum qilish jazosi tayinlangan.

Avvalroq Farg‘onada 17 yoshli bola yashayotgan uydan 30 kilodan ortiq narkotik moddalar topilgani to‘g‘risida xabar berilgandi. Shuningdek, Samarqandda fuqaroning uyidan salkam 32 kilo marixuana topilgan, Tojikiston va Qirg‘izistondan olib kelingan narkotik moddalar DXX tomonidan to‘xtatib qolingan edi.