O‘zbekistonning davlat qarzi o‘tgan yil davomida 5,7 milliard dollarga ko‘payib, 34,9 milliard dollarga yetdi. Bu haqda Iqtisodiyot va moliya vazirligi hisobotida so‘z boradi.
Qayd etilishicha, davlat tashqi qarzi 2023-yilda 3,73 milliardga oshib, 29,64 milliard dollarni tashkil etgan (YIMning 32,6 foizi). Bu mablag‘ning 23,91 milliard dollari hukumat nomidan jalb qilingan, 5,72 milliard dollari esa O‘zbekiston tomonidan kafolatlangan.
Davlat ichki qarzi 1,97 milliard dollarga oshib, 5,29 milliard dollarni tashkil etgan (YIMning 5,8 foizi). Shundan 1,78 milliard dollar (21,9 trillion so‘m) davlat qimmatli qog‘ozlari, 3,51 milliard dollari davlat tomonidan kafolatlangan ichki qarzdir.
Davlat qarzining mamlakat YIMiga nisbati 2022-yil oxiridagi 36,4 foizdan 2023-yil oxirida 38,4 foizgacha (35,7 foiz rejalashtirilgan edi) oshgan. Davlat qarzi 2024-yilda yalpi ichki mahsulotga (YIM) nisbatan 37 foiz atrofida bo‘lishi kutilgan edi.
Taqqoslash uchun: 2017-yilda davlat qarzi 11,5 milliard dollarni tashkil etgandi (olti yil ichida bu ko‘rsatkich 3 baravar oshdi). Gap “xususiy qarz”ni hisobga olmagan holda faqat davlat qarzi haqida ketmoqda.
Iqtisodiyot va moliya vazirligi taqdim etgan 2024–2026-yillarga mo‘ljallangan byudjetnomada keltirilgan dastlabki tahlillarda makroiqtisodiy hamda fiskal ko‘rsatkichlar barqarorligi taʼminlansa, davlat qarzining YIMga nisbati 2024-yilda 37 foiz, 2025-yilda 37,4 foiz, 2026-yilda 37,9 foiz atrofida bo‘lishi prognoz qilinayotgani aks etgan.
Izoh (0)