Qashqadaryo viloyatida hudud rahbari Murodjon Azimov tashabbusi bilan tashkil etilgan fan olimpiadasi g‘oliblari Qarshi davlat universitetiga imtihonsiz qabul qilindi. Bu haqda “Daryo”ga hokimlik axborot xizmati rahbari Ahror Sodiqov xabar berdi.
Bildirilishicha, fan olimpiadasi g‘oliblari universitetda grant asosida tahsil oladi.
Viloyat hokimi tashabbusi bilan joriy yilda ham 11-sinf o‘quvchilari o‘rtasida tashkil etilgan uch bosqichli “Viloyat hokimi fan olimpiadasi”ning viloyat bosqichi g‘oliblari taqdirlandi. Shu munosabat bilan tashkil etilgan tadbirda viloyat hokimi Murodjon Azimov so‘z olib, yoshlarni qutladi. Taqdirlash jarayonlarida soha mas’ullari, pedagoglar, g‘olib o‘quvchilar va ularning ustozlari hamda yaqin qarindoshlari ishtirok etib, g‘oliblarga viloyat hokimligining qimmatbaho sovg‘alari topshirildi, — deydi Ahror Sodiqov.
-PwodhEds.jpg)
Viloyat hokimi tashabbusi bilan tashkil etilgan fan olimpiadasida o‘quvchilarning matematika, fizika, biologiya, kimyo, informatika va axborot texnologiyalari, shuningdek, tarix, ona tili va adabiyot, xorijiy tillar bo‘yicha bilimlari sinovdan o‘tkazilgan.
Mazkur fan olimpiadasining fizika, kimyo va biologiya fanlari bo‘yicha ishtirokchilaridan 1, 2 va 3-o‘rinni qo‘lga kiritgan 9 nafar bitiruvchi Qarshi davlat universitetiga imtihonsiz, davlat granti asosida talabalikka tavsiya etilgan.
Tadbirda yoshlarga maxsus sertifikatlar topshirilib, prezident sovrini uchun “Xorijiy tillarni o‘qitish bo‘yicha eng yaxshi maktab” tanlovining viloyat bosqichi g‘oliblariga ham pul mukofotlari berilgan.
Izoh (0)