Tailand va Kamboja harbiylari o‘rtasida 24-iyul kuni qurolli to‘nashuvlar boshlangandi. O‘zbekiston tashqi ishlar vaziri matbuot kotibi Ahror Burxonov ikki davlat chegarasida yuz bergan qurolli to‘qnashuvlardan jabrlanganlar orasida O‘zbekiston fuqarolari yo‘qligini bildirdi.
O‘zbekistoning Bangkokdagi Bosh konsulxonasi ma’lumotlariga ko‘ra, hozirgi vaqtda Tailand va Kambodjada istiqomat qilayotgan O‘zbekiston fuqarolari orasida jabrlanganlar mavjud emas. Tailand poytaxti va turizm markazlarida vaziyat barqaror bo‘lib, xorijiy sayyohlar uchun xavf-xatar mavjud emas.
“O‘zbekiston Respublikasi Tashqi ishlar vazirligi Tailand va Kamboja o‘rtasidagi chegarada yuz bergan qurolli to‘qnashuv munosabati bilan yuzaga kelgan vaziyatni diqqat bilan kuzatmoqda. Biz barcha tomonlarni vaziyatni tinch yo‘l bilan hal qilishga va xalqaro huquq normalariga rioya qilishga chaqiramiz”, deyiladi vazirlik vakili xabarida.
Ahror Burxonov O‘zbekiston fuqarolaridan Kamboja bilan chegaradosh hududlarga safar qilmaslikni va rasmiy xabarlarni kuzatib borishni so‘radi. Favqulodda vaziyatlarda Bangkokdagi Bosh konsulxonaga (+66-2) 675-3995 yoki (+66-2) 675-3996 raqamlari orqali murojaat qilish mumkin.
“Vazirlik vatandoshlarimiz xavfsizligini ta’minlash uchun barcha zarur choralarni ko‘rishda davom etadi”, deyiladi xabarda.
Izoh (0)