Bugun, 24-iyul kuni Tailand va Kambodja harbiylari o‘rtasida qurolli to‘nashuvlar boshlandi. The Guardian nashrining xabar berishicha, Tailand qo‘shnisiga havo hujumlari bilan javob qaytargan.
Tailand rasmiylarining ta’kidlashicha, Kambodjaning 6 nafar qurollangan askari mamlakat chegarasiga yaqinlashgan. Oradan ko‘p o‘tmay, havoda dronlar ham paydo bo‘lgan. Tailandliklar vaziyatni yumshatish uchun ularga ogohlantirish bergani, biroq Kambodja tomoni bunga o‘t ochish bilan javob qaytarganini da’vo qildi.
Ushbu to‘qnashuvlardan oldinroq Tailand elchixonasi ehtimoliy mojaro sabab o‘z fuqarolarini Kambodjani tark etishga chaqirgan edi. Bundan tashqari, mamlakatning Kambodjadagi elchisi ham 23-iyul kuni ortga chaqirib olingandi.
Reuters’ning bildirishicha, ikki mamlakat o‘rtasidagi chegaralar yopib qo‘yilgan. Bugungi to‘qnashuvlar davomida allaqachon 2 nafar Tailand fuqarosi halok bo‘lgan va yana 2 kishi yaralangan. Qo‘shimcha qilinishicha, Tailand F-16 qiruvchilarini chegaraga joylashtirmoqda. Chegara hududida boshlangan qurolli to‘qnashuvlar intensivlashib bormoqda.
“Tailandning 86 ta qishlog‘idan 40 mingga yaqin tinch aholi xavfsizroq joylarga ko‘chirildi”, dedi tailandlik rasmiylar.
Izoh (0)