O‘zbekistondagi barcha “tez yordam”da yangi tizim yo‘lga qo‘yilmoqda

103 xizmatining barcha hududiy filiallarida Call-back tizimi yo‘lga qo‘yilmoqda. Bu haqda Sog‘liqni saqlash vazirligi xabar berdi.

Keltirilishicha, Samarqand viloyati tajribasidan kelib chiqqan holda joriy yildan Respublika tez tibbiy yordam markazining barcha hududiy filiallarida Call-back tizimi ishga tushirilyapti.

Uning ahamiyati nimada?

Ayrim hollarda brigadalar tomonidan bajarilgan tibbiy xizmatlar sifati yuzasidan turli tanqidiy murojaatlar kelib tushmoqda 103 xizmati faoliyatiga doir shu kabi eʼtirozlarni kamaytirish, fuqarolardan bo‘layotgan bunday murojaatlar sababini oldindan aniqlab, ularni o‘z vaqtida bartaraf etish maqsadida shu yildan boshlab barcha hududiy filiallarda tajriba-sinov tariqasida Call-back (qayta qo‘ng‘iroq) tizimi yo‘lga qo‘yilmoqda.

Ayni paytda mazkur tizim orqali Tez yordam brigadalari faoliyati doimiy nazorat qilib borilyapti. Natijada aholidan bo‘layotgan eʼtirozlar soni avvalgi yillarga nisbatan ancha kamaygan.

Xususan, o‘tgan yilning may—iyun oylarida 103 xizmatiga jami 783 ta ana shunday murojaat kelib tushgan bo‘lsa, 2025-yilning ayni shu davrida bu ko‘rsatkich 32,3 foizga kamayib, 538 tani tashkil etdi.

O‘zbekistonda iyulning jazirama issiq kuzatilgan kunlarida respublika bo‘yicha tez tibbiy yordam xizmatiga jami 247 ming 459 ta chaqiriq kelib tushgan. Ularning 172 ming 676 tasini shoshilinch ko‘rsatma, 65 ming 163 tasini esa surunkali kasalliklar bilan bog‘liq murojaatlar tashkil etdi.

Tegishli mas’ul tashkilotlar tomonidan ommaviy axborot vositalari va ijtimoiy tarmoqlar orqali fuqarolarga anomal issiq havo sharoitida ehtiyot choralarini ko‘rish to‘g‘risida berilgan tavsiyalar tufayli chaqiriqlar soni undan oldingi haftaga (24—29-iyun) nisbatan 1,2 foizga kamaydi.