103 хизматининг барча ҳудудий филиалларида Call-back тизими йўлга қўйилмоқда. Бу ҳақда Соғлиқни сақлаш вазирлиги хабар берди.
Келтирилишича, Самарқанд вилояти тажрибасидан келиб чиққан ҳолда жорий йилдан Республика тез тиббий ёрдам марказининг барча ҳудудий филиалларида Call-back тизими ишга тушириляпти.
Унинг аҳамияти нимада?
Айрим ҳолларда бригадалар томонидан бажарилган тиббий хизматлар сифати юзасидан турли танқидий мурожаатлар келиб тушмоқда 103 хизмати фаолиятига доир шу каби эътирозларни камайтириш, фуқаролардан бўлаётган бундай мурожаатлар сабабини олдиндан аниқлаб, уларни ўз вақтида бартараф этиш мақсадида шу йилдан бошлаб барча ҳудудий филиалларда тажриба-синов тариқасида Call-back (қайта қўнғироқ) тизими йўлга қўйилмоқда.
Айни пайтда мазкур тизим орқали Тез ёрдам бригадалари фаолияти доимий назорат қилиб бориляпти. Натижада аҳолидан бўлаётган эътирозлар сони аввалги йилларга нисбатан анча камайган.
Хусусан, ўтган йилнинг май—июнь ойларида 103 хизматига жами 783 та ана шундай мурожаат келиб тушган бўлса, 2025 йилнинг айни шу даврида бу кўрсаткич 32,3 фоизга камайиб, 538 тани ташкил этди.
Ўзбекистонда июлнинг жазирама иссиқ кузатилган кунларида республика бўйича тез тиббий ёрдам хизматига жами 247 минг 459 та чақириқ келиб тушган. Уларнинг 172 минг 676 тасини шошилинч кўрсатма, 65 минг 163 тасини эса сурункали касалликлар билан боғлиқ мурожаатлар ташкил этди.
Тегишли масъул ташкилотлар томонидан оммавий ахборот воситалари ва ижтимоий тармоқлар орқали фуқароларга аномал иссиқ ҳаво шароитида эҳтиёт чораларини кўриш тўғрисида берилган тавсиялар туфайли чақириқлар сони ундан олдинги ҳафтага (24—29 июнь) нисбатан 1,2 фоизга камайди.
Изоҳ (0)