Mamlakatda naqd pulda bir martalik xarid qilganlarning 47 foizi 100 ming so‘mdan 500 ming so‘mgacha sarflaydi. Bu bo‘yicha joriy yil iyunda Markaziy bank maxsus so‘rov o‘tkazdi.
Tahlilga ko‘ra, so‘rovda qatnashganlardan 15 foizi kundalik to‘lovlarni naqd pulda, 33 foizi bank kartasi orqali, 52 foizi har ikkala shaklda amalga oshirishini bildirgan.
Kundalik xaridlar uchun naqd pulda to‘lov qiladiganlar ulushi Andijon, Jizzax, Namangan, Navoiy, Samarqand viloyatlarida ko‘p.
Ishtirokchilardan 47 foizi naqd puldagi bir martalik xaridlari 100 ming so‘mdan 500 ming so‘mgacha yetishini maʼlum qilgan. O‘z navbatida 35 foiz qatnashchilar 100 ming so‘mgacha, 12 foizi 500 ming so‘mdan 1 million so‘mgacha, 6 foizi 1 million so‘mdan yuqori qiymatdagi xaridlar qilishini taʼkidlagan.
“Respondentlar tomonidan muomalada 10 ming, 50 ming, 5 ming, 100 ming va 20 ming so‘m nominaldagi pul belgilariga ehtiyoj nisbatan yuqoriligi maʼlum qilingan. Mazkur holat aholi naqd puldagi kundalik xaridlar va boshqa xarajatlari uchun asosan ushbu nominaldagi pullardan ko‘proq foydalanayotganligidan dalolat beradi”, deyiladi tahlilda.
Hududlarda 10 ming so‘mlik banknotlarga Qoraqalpog‘istonda, 20 ming so‘mlik naqd pullarga Andijon viloyati aholisida ehtiyoj yuqori ekani aniqlangan.
O‘rganishlarga ko‘ra, aholi jamg‘armalarining 23 foizini naqd pul shaklida saqlaydi. Yana shuncha qismini bank kartalarida saqlashga odatlangan.
Bugungi kunda odamlarning 88 foizi kommunal to‘lovlarni mobil ilovalar orqali to‘lamoqda.
Avvalroq joriy yil I yarmida mamlakatda naqd pulga talab 2024-yil mos davridagidan 23 foizga oshgani xabar qilingandi. 2025-yil yanvar–iyun oylarida banklar orqali naqd pul aylanmasi hajmi 563 trln so‘mni tashkil etgan. Yarim yil davomida Markaziy bank muomalaga qo‘shimcha 5,2 trln so‘m naqd pul chiqargan.
Izoh (0)