Мамлакатда нақд пулда бир марталик харид қилганларнинг 47 фоизи 100 минг сўмдан 500 минг сўмгача сарфлайди. Бу бўйича жорий йил июнда Марказий банк махсус сўров ўтказди.
Таҳлилга кўра, сўровда қатнашганлардан 15 фоизи кундалик тўловларни нақд пулда, 33 фоизи банк картаси орқали, 52 фоизи ҳар иккала шаклда амалга оширишини билдирган.
Кундалик харидлар учун нақд пулда тўлов қиладиганлар улуши Андижон, Жиззах, Наманган, Навоий, Самарқанд вилоятларида кўп.
Иштирокчилардан 47 фоизи нақд пулдаги бир марталик харидлари 100 минг сўмдан 500 минг сўмгача етишини маълум қилган. Ўз навбатида 35 фоиз қатнашчилар 100 минг сўмгача, 12 фоизи 500 минг сўмдан 1 миллион сўмгача, 6 фоизи 1 миллион сўмдан юқори қийматдаги харидлар қилишини таъкидлаган.
“Респондентлар томонидан муомалада 10 минг, 50 минг, 5 минг, 100 минг ва 20 минг сўм номиналдаги пул белгиларига эҳтиёж нисбатан юқорилиги маълум қилинган. Мазкур ҳолат аҳоли нақд пулдаги кундалик харидлар ва бошқа харажатлари учун асосан ушбу номиналдаги пуллардан кўпроқ фойдаланаётганлигидан далолат беради”, дейилади таҳлилда.
Ҳудудларда 10 минг сўмлик банкнотларга Қорақалпоғистонда, 20 минг сўмлик нақд пулларга Андижон вилояти аҳолисида эҳтиёж юқори экани аниқланган.
Ўрганишларга кўра, аҳоли жамғармаларининг 23 фоизини нақд пул шаклида сақлайди. Яна шунча қисмини банк карталарида сақлашга одатланган.
Бугунги кунда одамларнинг 88 фоизи коммунал тўловларни мобил иловалар орқали тўламоқда.
Аввалроқ жорий йил I ярмида мамлакатда нақд пулга талаб 2024 йил мос давридагидан 23 фоизга ошгани хабар қилинганди. 2025 йил январь–июнь ойларида банклар орқали нақд пул айланмаси ҳажми 563 трлн сўмни ташкил этган. Ярим йил давомида Марказий банк муомалага қўшимча 5,2 трлн сўм нақд пул чиқарган.
Изоҳ (0)