Oliy sud raisi Baxtiyor Islomov 9-noyabr kuni O‘zbekistonda faoliyat yurituvchi advokatlar bilan muloqot qilgani, sudyalarda haqiqiy aybdorlarni jazolash uchun ba’zan qat’iyat yetishmayotganini aytgani xabar berilgandi. Amaliyotchi yurist Saidali Muxtoraliyev ma’lumot berishicha, Oliy sud raisi mazkur muloqot davomida tergovchilar asossiz qo‘ygan ayblovlari uchun javob berishi kerakligi haqida ham gapirgan.
Necha yillardan beri bu muammo bor. Tergovga qulayi, ayblovlarni “buket” qilib, shishirib sudga chiqarsa-da, ana undan keyin sud uning ishini tozalab bersa. O‘zi ham biladi noto‘g‘ri qilayotganini. Oldin qo‘shimcha tergovga qaytarish bor edi. Tergovchi bir nechta moddalarni yo og‘irrog‘ini qo‘yib chiqarardiki, juda bo‘lsa, qayta kvalifikatsiya qilishaveradi deb. Lekin bugungi kunda ham bu narsa to‘xtagani yo‘q. Hisobotlarda ko‘ryapmiz, qanchadan-qancha odam sudda oqlanyapti, tergovda asossiz qo‘yilgan ayblovlar sudlar tomonidan chiqarib tashlanyapti, degan Baxtiyor Islomov.
Oliy sud raisi advokatlar bilan muloqot qilar ekan, tergovni ozgina bo‘lsa-da, mas’uliyatni sezadigan darajaga olib chiqish taklifini bergan.
Agar bunday holatlarga sudlar xususiy ajrim orqali o‘z vaqtida munosabat bildirmas ekan, tergov to‘g‘rilanmaydi. Ular sezishi kerak. Ilgari tergovga qaytarilgan ishlar bo‘lsa tergovchilar jazoga tortilar edi, jazosiz qolmas edi. Bu masalada haqiqatdan ham, xususiy ajrim chiqarish yo‘llari orqali, ularni (tergovni) ozgina bo‘lsa-da, mas’uliyatini sezadigan darajaga olib chiqishimiz kerak”, dedi Oliy sud raisi.
Izoh (0)