Qashqadaryo viloyat maktabgacha va maktab taʼlimi boshqarmasi ko‘mir mahsulotlarini tashish xizmati uchun o‘tkazilgan tender bekor qilindi. Bu haqda Korrupsiyaga qarshi kurashish agentligi “Daryo”ga maʼlum qildi.
Maktabgacha va maktab taʼlimi vazirligining Qashqadaryo viloyati boshqarmasi viloyatning 7 ta tumani va Shahrisabz shahar ko‘mir omborlaridan hududlardagi 832 ta maktab va bog‘chalarga ko‘mir yetkazish bo‘yicha tender o‘tkazgandi. Unda “Transport texno” MCHJ g‘olib bo‘lgan edi.
Antikorrupsiya agentligi mazkur tenderda ishtirokchilarga adolatsiz baho qo‘yilib, xizmat uchun past narx taklif qilgan korxonalar mag‘lub bo‘lganini, shu sabab tanlov natijalari bekor qilinishini so‘rab vazirlik hamda boshqarmaga taqdimnoma kiritgandi. Shunga qaramay, 23-iyunda boshqarma “Transport texno” MCHJ bilan shartnoma tuzgan.
Agentlik axborot xizmatining “Daryo”ga maʼlum qilishicha, hozirda Qashqadaryo viloyat maktabgacha va maktab taʼlimi boshqarmasi tomonidan o‘tkazilgan tender bekor qilingan.
Izoh (0)